‘അവന് പണമാണ് വേണ്ടത്, ഇനിയൊരാളെ വിശ്വസിക്കാനോ സ്നേഹിക്കാനോ കഴിയില്ല’, ഡോ ഷെഹ്നയുടെ ആത്മഹത്യാക്കുറിപ്പ് കുറിപ്പ് പുറത്ത്; റുവൈസ് നൽകിയ ജാമ്യ ഹർ‍ജി ഹൈക്കോടതി ഇന്ന് പരിഗണിക്കും

തിരുവനന്തപുരം: തിരുവനന്തപുരം സ്വദേശിയായ ഡോ ഷെഹ്നയുടെ ആത്മഹത്യ കുറിപ്പ് പുറത്ത്. മെഡിക്കൽ കോളേജിലെ പിജി വിദ്യാര്‍ത്ഥിനിയായ ഡോ ഷെഹ്നയോട് സുഹൃത്തായിരുന്ന ഡോ റുവൈസ് മുഖത്ത് നോക്കി പണം ആവശ്യപ്പെട്ടെന്ന് പോലീസ് പറഞ്ഞു. ഷെഹ്നയുടെ ആത്മഹത്യാക്കുറിപ്പിൽ റുവൈസിനെ കുറിച്ച് ഗുരുതര പരാമര്‍ശങ്ങളാണ് ഉള്ളതെന്നും പോലീസ് ഹൈക്കോടതിയിൽ നൽകിയ റിപ്പോർട്ടിൽ പറയുന്നു.

ഡോ ഷെഹ്നയുടെ ആത്മഹത്യ കുറിപ്പ് :
ചതിയുടെ മുഖം മൂടി തനിക്ക് അഴിച്ചുമാറ്റാൻ കഴിഞ്ഞില്ല. അവന് പണമാണ് വേണ്ടത്, അത് എന്റെ മുഖത്ത് നോക്കി പറഞ്ഞു കഴിഞ്ഞു. ഇനിയും ഞാൻ എന്തിന് ജീവിക്കണം? ജീവിക്കാൻ തോന്നുന്നില്ല. ഈ ചതിക്ക് പകരമായി നല്ല രീതിയിൽ ജീവിച്ചു കാണിക്കേണ്ടതാണ്. പക്ഷെ എന്റെ future Blank ആണ്. ഇനി ഒരാളെ വിശ്വസിക്കാനോ സ്നേഹിക്കാനോ കഴിയില്ല. സഹോദരി, ഉമ്മയെ നന്നായി നോക്കണമെന്നും ഷെഹ്ന ആത്മഹത്യ കുറിപ്പിൽ എഴുതിയിരുന്നു.

ആത്മഹത്യാ കുറിപ്പ് പുറത്തായതോടെ പോലീസിനെ വിമര്‍ശിച്ചതിന്‍റെ പ്രതികാരമാണ് തന്‍റെ അറസ്റ്റെന്ന് വാദിച്ച റുവൈസിൻറെ മൊഴി പൊളിയുകയായിരുന്നു. ഇത് കൂടാതെ ഷെഹ്ന സുഹൃത്ത് മാത്രമായിരുന്നുവെന്ന പ്രതിയുടെ വാദവും പൊളിഞ്ഞു. ഇരുവരും തന്നിൽ അടുത്ത ബന്ധമുണ്ടായിരുന്നതായും ഇരുവരും ഒരുമിച്ച് യാത്രകൾ നടത്തിയിട്ടുണ്ടെന്നും പോലീസ് കണ്ടെത്തി. അതിന്റെ ചിത്രങ്ങളും പോലിസ് കോടതിയിൽസമർപ്പിച്ചു.
ഷെഹ്ന മരിക്കുന്നതിന് രണ്ട് ദിവസം മുമ്പ് കോളേജ് ക്യാമ്പസിൽ വച്ചാണ് റുവൈസ് ഷെഹ്നയോട് പണം ആവശ്യപ്പെട്ടതെന്ന് പോലീസ് പറയുന്നത്.

അതേസമയം, റുവൈസ് നൽകിയ ജാമ്യ ഹർ‍ജി ഹൈക്കോടതി ഇന്ന് പരിഗണിക്കും. സ്ത്രീധനം ചോദിക്കുന്നത് കുറ്റകരമാണെന്ന് കഴിഞ്ഞ ദിവസത്തെ വാദത്തിനിടെ ഹൈക്കോടതി ജഡ്ജി പറഞ്ഞിരുന്നു.