പോലീസിന്‍റെ ഊതിക്കൽ പരിപാടിക്ക് കടിഞ്ഞാൺ ; കേസ് നിലനിൽക്കില്ലെന്ന് ഹൈക്കോടതി

കൊട്ടാരക്കര: മദ്യപിച്ചിട്ടുണ്ടോ എന്നറിയാൻ മെഷീനിൽ ഊതിച്ചു നോക്കിയ ശേഷം കേസെടുക്കുന്ന പോലീസിന്‍റെ നടപടിക്ക് കടിഞ്ഞാണിട്ട് ഹൈക്കോടതി. ഇനിമുതൽ ഊതിച്ചുനോക്കി കേസെടുത്താൽ നിലനിൽക്കില്ല. പൊതുസ്ഥലത്ത് മദ്യപിച്ചെന്ന പേരിൽ തലവൂർ സ്വദേശികളായ മൂന്നുപേരുടെ പേരിൽ കുന്നിക്കോട് പോലീസ് രജിസ്റ്റർ ചെയ്ത കേസ് റദ്ദാക്കിക്കൊണ്ടാണ് ഹൈക്കോടതിയുടെ നിരീക്ഷണം.

ശാസ്ത്രീയമായി രക്തപരിശോധന നടത്തി നിശ്ചിത അളവിൽ കൂടുതൽ ആൽക്കഹോൾ ഉണ്ടെങ്കിൽ മാത്രമേ കേസെടുക്കാൻ പാടുള്ളൂ. ഇക്കാര്യം എന്ന 2018-ലെ വിധിയിൽ കോടതി വ്യക്തമാക്കിയിട്ടുള്ളതാണ്. ഇക്കാര്യം കോടതി വീണ്ടും പോലീസിനെ ഓർമപ്പെടുത്തി. ചില മരുന്നുകൾക്ക് ആൽക്കഹോളിന്‍റെ ഗന്ധമുണ്ട്. ആൽക്കോമീറ്റർ പരിശോധനയിലും ഇതു വ്യക്തമാകില്ല. രക്തപരിശോധനയാണ് ശരിയായ മാർഗമെന്ന് 2018-ൽ വൈക്കം സ്വദേശിയുടെ കേസിൽ കോടതിയുടെ വിധിയുണ്ട്.

മദ്യപിച്ചെന്ന് സംശയമുള്ളവരെ മുഖത്തേക്കോ കൈയിലേക്കോ ഊതിക്കുകയും മദ്യത്തിന്‍റെ ഗന്ധത്തിന്‍റെ അടിസ്ഥാനത്തിൽ പോലീസ് പെറ്റിക്കേസെടുക്കുകയും ചെയ്യുന്നത് പതിവാണ്. ആശുപത്രിയിലെത്തിച്ചാലും രക്തപരിശോധന നടത്താതെ മദ്യപിച്ചിരുന്നെന്ന് ഡോക്ടറുടെ സാക്ഷ്യപത്രം വാങ്ങുകയും ചെയ്യുന്നു. കുന്നിക്കോട് പോലീസ് വ്യക്തിവിരോധത്തിന്‍റെ പേരിൽ കേസെടുത്തെന്നായിരുന്നു പരാതിക്കാരുടെ ആക്ഷേപം. പുനലൂർ ഡി വൈ എസ് പിയും കേസിനനുകൂലമായ റിപ്പോർട്ടാണ് നൽകിയിരുന്നത്. തുടർന്നാണ് ഇവർ ഹൈക്കോടതിയെ സമീപിച്ചത്.