കരഞ്ഞ് വീണു … ഒടുവിൽ ജയ് ഹിന്ദ് വിളിച്ച് സല്യൂട്ട് നല്‍കി ഹിമാന്‍ഷി.. വിനയ് നർവലിന് ആദരാഞ്ജലി അർപ്പിച്ച് രാജ്യം ; മൃതദേഹം ഹരിയാനയിലേക്ക് കൊണ്ട് പോയി

ദില്ലി : പഹൽഗാം ഭീകരാക്രമണത്തിൽ കൊല്ലപ്പെട്ട നാവിക സേന ഉദ്യോഗസ്ഥന്‍ വിനയ് നർവലിന് രാജ്യം ആദരാഞ്ജലി അർപ്പിച്ചു. ഉന്നത നാവിക സേന ഉദ്യോഗസ്ഥർ ദില്ലി വിമാനത്താവളത്തിലെത്തി അന്ത്യോപചാരം അർപ്പിച്ചു. ദില്ലി മുഖ്യമന്ത്രി രേഖ ഗുപ്തയാണ് മൃതദേഹം ഏറ്റുവാങ്ങിയത്.

മൃതദേഹത്തിന് മുന്നിൽ കരഞ്ഞു വീണ ഭാര്യ ഹിമാൻഷി ഒടുവിൽ ‘ജയ്ഹിന്ദ്’ വിളിച്ചാണ് , വിനയ് നർവലിനു വിട നൽകിയത്. മൃതദേഹം ഹരിയാനയിലേക്ക് കൊണ്ട് പോയി.

വിനയ് നർവലിന്റെ മൃതദേഹത്തിനരികെയിരിക്കുന്ന ഹിമാൻഷിയുടെ ചിത്രങ്ങൾ ഇന്നലെ സമൂഹ മാധ്യമങ്ങളിൽ പ്രചരിച്ചിരുന്നു. ഭീകരാക്രമണത്തിന്റെ ക്രൂരത വിളിച്ചു പറയുന്നതായിരുന്നു ചിത്രം. മധുവിധു ആഘോഷിക്കാൻ ഹിമാൻഷിക്കൊപ്പം കശ്മീരിലെത്തിയ വിനയ്‌യെയാണ് ഭീകരർ‌ വധിച്ചത്. ഏപ്രിൽ 16നായിരുന്നു ഇരുവരുടെയും വിവാഹം. കൊച്ചിയിൽ നാവികസേനാ ഉദ്യോഗസ്ഥനായിരുന്നു കൊല്ലപ്പെട്ട വിനയ്.

ഈ മാസം 16നാണ് വിനയ് നർവാളും ഹിമാൻഷിയും വിവാഹിതരായത്. നേവിയിൽ ലെഫ്റ്റന്റ് കേണലാണ് ഹരിയാനയിലെ കര്‍ണാൽ സ്വദേശിയായ വിനയ്. രണ്ട് വർഷം മുമ്പ് സേനയിൽ ചേർന്ന വിനയ് കൊച്ചി നേവൽ ബേസിലാണ് സേവനമനുഷ്ഠിച്ചിരുന്നത്. ഏപ്രിൽ 19നായിരുന്നു വിനയ്-ഹിമാൻഷി ദമ്പതികളുടെ വിവാഹ സൽക്കാരം. 21ന് ജമ്മു കശ്മീരിൽ എത്തിയ അവർ പിറ്റേന്ന് പഹൽഗാമിൽ എത്തിയപ്പോഴാണ് ദുരന്തം. ആക്രമണം നടന്ന് ഏറ്റവുമാദ്യം പുറത്തുവന്നതും ഹിമാൻഷിയുടെ ദൃശ്യങ്ങളായിരുന്നു.