ബംഗ്ലാദേശിലെ ഹിന്ദു വംശഹത്യ ! യുഎൻ ആസ്ഥാനത്തിന് മുന്നിൽ വൻ പ്രതിഷേധ റാലി

ബംഗ്ലാദേശിലെ ഹിന്ദുക്കൾക്കും മറ്റ് ന്യൂനപക്ഷങ്ങൾക്കും എതിരെ നടക്കുന്ന അക്രമങ്ങൾ അവസാനിപ്പിക്കണമെന്നും അവർക്ക് സംരക്ഷണം നൽകണമെന്നും ആവശ്യപ്പെട്ട് യുഎൻ ആസ്ഥാനത്തിന് മുന്നിൽ വൻ പ്രതിഷേധം. വാഷിംഗ്ടൺ ആസ്ഥാനമായുള്ള എൻജിഒയായ ഹിന്ദുആക്ഷൻ പറയുന്നതനുസരിച്ച് ആളുകൾ സ്വമേധയാ പ്രതിഷേധത്തിനെത്തുകയായിരുന്നു. ന്യൂയോർക്കിലെ മറ്റ് സ്ഥലങ്ങളിലും പ്രതിഷേധം നടന്നതായി ഹിന്ദു ആക്‌ഷൻ അറിയിച്ചു.

ബംഗ്ലാദേശിൽ ഹിന്ദുക്കളെ ലക്ഷ്യമിട്ടുള്ള അക്രമങ്ങൾക്കെതിരെ പ്രതികരിച്ചതിന് പ്രതിഷേധത്തിൽ പങ്കെടുത്തവരെ ഹിന്ദുആക്ഷൻ അഭിനന്ദിച്ചു.

“ബംഗ്ലാദേശിൽ നടന്നു കൊണ്ടിരിക്കുന്ന രാഷ്ട്രീയ അക്രമങ്ങളെയും മതപീഡനങ്ങളെയും ഞങ്ങൾ ശക്തമായി അപലപിക്കുന്നു. ബംഗ്ലാദേശി ജനതയുടെ പങ്കിട്ട താൽപ്പര്യത്തിന് വേണ്ടി പ്രവർത്തിക്കാനും ഈ അക്രമം ഉടനടി അവസാനിപ്പിക്കാനും ഇടക്കാല സർക്കാരിനോട് അഭ്യർത്ഥിക്കുന്നു.”- എൻജിഒ വൃത്തങ്ങൾ പറഞ്ഞു. നേരത്തെ, രാജ്യത്ത് ഹിന്ദുക്കൾക്കെതിരായ അക്രമങ്ങൾ അവസാനിപ്പിക്കാൻ ബംഗ്ലാദേശ് സർക്കാരിനെ സഹായിക്കണമെന്ന് ആവശ്യപ്പെട്ട് യുഎസ് കോൺഗ്രസ് അംഗം രാജാ കൃഷ്ണമൂർത്തി യുഎസ് സ്റ്റേറ്റ് സെക്രട്ടറി ആൻ്റണി ബ്ലിങ്കെന് കത്തെഴുതിയിരുന്നു.