ഹിന്ദുക്കളെ ഒന്നിപ്പിക്കണം !ആർഎസ്എസിനൊപ്പം ഒരുമിച്ച് പ്രവർത്തിക്കുമെന്ന് പ്രവീൺ തൊഗാഡിയ ; ആറ് വർഷത്തെ ഇടവേളയ്ക്ക് ശേഷം ആർഎസ്എസ് ആസ്ഥാനം സന്ദർശിച്ചു

അഹമ്മദാബാദ് : വിശ്വഹിന്ദു പരിഷത്തിൻ്റെ (വിഎച്ച്പി) വർക്കിംഗ് പ്രസിഡൻ്റ് സ്ഥാനമൊഴിഞ്ഞ ശേഷം സംഘപരിവാറുമായി അകലം പാലിച്ചിരുന്ന ഡോ. പ്രവീൺ തൊഗാഡിയ ആറ് വർഷത്തെ ഇടവേളയ്ക്ക് ശേഷം ആർഎസ്എസ് ആസ്ഥാനം സന്ദർശിച്ചു. ആർഎസ്എസ് സർസംഘ് ചാലക് മോഹൻജി ഭാഗവതുമായി കൂടിക്കാഴ്ച നടത്തിയ അദ്ദേഹം ഹിന്ദുക്കളെയും ഹിന്ദു സമൂഹത്തെയും ഒന്നിപ്പിക്കാനായി ചേർന്ന് പ്രവർത്തിക്കുമെന്ന് വ്യക്തമാക്കി. ബംഗ്ളാദേശിലെ ഹിന്ദു വംശഹത്യ, സ്ത്രീ ശാക്തീകരണം, തുടങ്ങിയ വിഷയങ്ങളും ഇരുവരും ചർച്ച ചെയ്തു.

കാൻസർ ശസ്ത്രക്രിയാ വിദഗ്ധനും മുൻ സ്വയംസേവകനുമായ തൊഗാഡിയ, 2018 ലാണ് വിഎച്ച്പിയുടെ പ്രസിഡൻറ് സ്ഥാനത്ത് നിന്ന് രാജിവയ്ക്കുന്നത്. 35 വർഷമായി വിഎച്ച്പിയിൽ പ്രവർത്തിച്ച അദ്ദേഹം പിന്നീട് ഗുജറാത്തിൽ ഭാരതീയ ജനതാ പാർട്ടിയുടെ ഉയർച്ചയിൽ പ്രധാന പങ്കുവഹിച്ചു.

രാമക്ഷേത്ര വിഷയത്തിൽ സംസാരിച്ച തൊഗാഡിയ, രാമക്ഷേത്രത്തിൻ്റെ പുരോഗതിയിൽ മോഹൻജി ഭാഗവതിനെ അഭിനന്ദിക്കുന്നതായും ക്ഷേത്രനിർമ്മാണം മുമ്പ് ജാതിയുടെ അടിസ്ഥാനത്തിൽ വിഭജിക്കപ്പെട്ടിരുന്ന ഹിന്ദു സമൂഹത്തെ ഒന്നിപ്പിച്ചതായും പറഞ്ഞു.