ചമയങ്ങളില്ലാത്ത ആനച്ചേല് കാണാൻ വടക്കുംനാഥ ക്ഷേത്രത്തിലേക്ക് ആയിരങ്ങളുടെ ഒഴുക്ക്; ചരിത്രപ്രസിദ്ധമായ ആനയൂട്ടിന് ഗണപതിഹോമത്തോടെ സമാരംഭം; ആനപ്രേമികളിൽ ഒന്നാമനായി കേന്ദ്രമന്ത്രി സുരേഷ്ഗോപിയും

തൃശ്ശൂർ: ചരിത്രപ്രസിദ്ധമായ വടക്കുംനാഥ ക്ഷേത്രത്തിലെ ആനയൂട്ടിന് തുടക്കമായി. കർക്കടക മാസാരംഭമായ ഇന്ന് അതിരാവിലെ മഹാഗണപതി ഹോമത്തോടെയാണ് ആനയൂട്ട് ആരംഭിച്ചത്. 7 പിടിയാനകൾ ഉൾപ്പെടെ 65 ആനകളാണ് ഇക്കൊല്ലം ആനയൂട്ടിൽ പങ്കെടുക്കുന്നത്. 9 മണിയോടെയാണ് ആനയൂട്ട് ആരംഭിച്ചത്. കനത്ത മഴയെ തുടർന്ന് ജില്ലയിലെ വിദ്യാഭ്യാസ സ്ഥാപനങ്ങൾക്ക് ഇന്ന് അവധിയാണ്. അതുകൊണ്ടുതന്നെ വലിയ ജനക്കൂട്ടം ആനയൂട്ട് കാണാൻ വടക്കുംനാഥ സന്നിധിയിൽ എത്തിയിരുന്നു. ചമയങ്ങളില്ലാതെ ആനപ്രേമികൾക്ക് ആനച്ചന്തം ആസ്വദിക്കാൻ കഴിയുമെന്നതാണ് ആനയൂട്ടിന്റെ പ്രത്യേകത.

9 തരം പഴവർഗ്ഗങ്ങളും 200 കിലോ അരിയുടെ ചോറുമാണ് ആനകൾക്കായി ഒരുക്കിയിരുന്നത്. ഇന്നത്തെ ചടങ്ങുകളുടെ മറ്റൊരു ആകർഷണം കേന്ദ്രമന്ത്രി സുരേഷ്‌ഗോപിയുടെ സാന്നിദ്ധ്യമാണ്. കേന്ദ്രമന്ത്രി ആയതിന് ശേഷം ഇതാദ്യമായാണ് സുരേഷ്‌ഗോപി ആനയൂട്ടിൽ പങ്കെടുക്കുന്നത്. പങ്കെടുത്തില്ലെങ്കിലും കഴിഞ്ഞവർഷം ആനയൂട്ടിനായി സംസ്ഥാനത്തിന് പുറത്തുനിന്നും പൈനാപ്പിൾ അദ്ദേഹം എത്തിച്ചു നൽകിയിരുന്നു.

1985 മുതലാണ് തൃശ്ശൂർ വടക്കുംനാഥ ക്ഷേത്രത്തിൽ ആനയൂട്ട് ആരംഭിച്ചത്. ഇവിടെനിന്നും ഏഷ്യൻ ഗെയിംസിൽ പങ്കെടുക്കാൻ കൊണ്ടുപോയ ആനകൾക്ക് തിരിച്ചെത്തിയപ്പോൾ ആരോഗ്യം മോശമാകുകയും ക്ഷീണം അനുഭവപ്പെടുകയും ചെയ്‌തിരുന്നു. അത് പരിഹരിക്കാൻ തുടങ്ങിയ ആനയൂട്ട് തുടർന്ന് എല്ലാവർഷവും തുടരുകയായിരുന്നു. ആനയൂട്ടിന് ശേഷം കർക്കടക മാസം പ്രമാണിച്ച് ആനകൾക്ക് സുഖ ചികിത്സയുമുണ്ടാകും.