നെയ്യാറ്റിൻകരയിലെ വീട്ടമ്മയുടെ ആത്മഹത്യ ! കോൺഗ്രസ് കൗൺസിലർ ജോസ് ഫ്രാങ്ക്ളിനെതിരെ ലൈംഗികാതിക്രമ കുറ്റവും ചുമത്തി

തിരുവനന്തപുരം നെയ്യാറ്റിൻകരയിലെ ബേക്കറി ഉടമയായ വീട്ടമ്മയുടെ ആത്മഹത്യയിൽ കോൺഗ്രസ് കൗൺസിലർ ജോസ് ഫ്രാങ്ക്ളിനെതിരെ ലൈംഗികാതിക്രമ കുറ്റവും ചുമത്തി. നേരത്തെ ആത്മഹത്യാപ്രേരണ കുറ്റവും ഇയാൾക്കെതിരെ ചുമത്തിയിരുന്നു. ജീവനൊടുക്കിയ സലിത കുമാരിയുടെ ആത്മഹത്യ കുറിപ്പ് മക്കളുടെ മൊഴി എന്നിവ പരിഗണിച്ചാണ് കേസെടുത്തത്. ജോസ് ഫ്രാങ്ക്ളിൻ ഒളിവിലാണ്.

ബുധനാഴ്ചയാണ് സലിത കുമാരി വീട്ടിൽ ജീവനൊടുക്കിയത്. ഗ്യാസ് തുറന്നുവിട്ടതിനു ശേഷം ഇവർ തീകൊളുത്തുകയായിരുന്നു. അടുപ്പില്‍ നിന്നു തീ പടര്‍ന്ന് പൊള്ളലേറ്റു മരിച്ചെന്നാണു പൊലീസ് ആദ്യം കരുതിയതെങ്കിലും വീട്ടിൽ നടത്തിയ പരിശോധനയിൽ ബൈബിളിൽ നിന്നും രണ്ട് ആത്മഹത്യാകുറിപ്പുകൾ കണ്ടെത്തുകയായിരുന്നു. മകനും മകൾക്കുമായി പ്രത്യേകം ആത്മഹത്യ കുറിപ്പുകളായിരുന്നു എഴുതിയിരുന്നത്.മകൻ രാഹുലിനെഴുതിയ കുറിപ്പിലാണ് കൗൺസിലറും ഡിസിസി ജനറൽ സെക്രട്ടറിയുമായ ജോസ് ഫ്രാങ്ക്‌ളിൻ തന്നെ ജീവിക്കാൻ അനുവദിക്കുന്നില്ലെന്ന് പറയുന്നത്. ലൈംഗിക താല്പര്യങ്ങൾക്ക് നിർബന്ധിക്കുന്നുവെന്നും,പല വിധത്തിൽ ബുദ്ധിമുട്ടിക്കുന്നുവെന്നും ആത്മഹത്യാ കുറിപ്പിൽ ഉണ്ടായിരുന്നു.
ജോസ് ഫ്രാങ്ക്ളിൻ രാത്രി വൈകി അമ്മയെ വിളിച്ചു ശല്യപ്പെടുത്താറുണ്ടെന്നു മകനും മകളും പൊലീസിന് മൊഴി നൽകി.ജോസ് ഫ്രാങ്ക്ളിന്റെ അറസ്റ്റ് ആവശ്യപ്പെട്ടു ബിജെപി പ്രതിഷേധം ശക്തമാക്കിയിരിക്കുകയാണ്