കർണാടകയിൽ വന്‍ ലഹരി വേട്ട !! 75 കോടി വിലമതിക്കുന്ന 38 കിലോ എംഡിഎംഎയുമായി രണ്ട് ദക്ഷിണാഫ്രിക്കൻ വനിതകൾ പിടിയിൽ

​ബെം​ഗളൂരു: കർണാടകയിൽ വന്‍ ലഹരി വേട്ട. അന്താരാഷ്ട്ര വിപണിയിൽ 75 കോടി വിലമതിക്കുന്ന 38 കിലോ എംഡിഎംഎയുമായി രണ്ട് ദക്ഷിണാഫ്രിക്കൻ വനിതകളെ മംഗളൂരു പോലീസ് പിടികൂടി. ഇലക്ടോണിക് സിറ്റിയ്ക്ക് സമീപമുള്ള നീലാദ്രി നഗറില്‍ വച്ചാണ് ഇവർ പിടിയിലാകുന്നത്. സംസ്ഥാനത്ത് ഇതുവരെ നടന്നതില്‍ വച്ച് ഏറ്റവും വലിയ ലഹരി വേട്ടയാണിത്.

ദക്ഷിണാഫ്രിക്കയിലെ പ്രിട്ടോറിയയില്‍ നിന്നുള്ള അഡോണിസ് ജബൂലി (31), ആബിഗലി അഡോണിസ് (30) എന്നിവരെയാണ് 37.8 കിലോ എംഡിഎം.എയുമായി പോലീസ് അറസ്റ്റ് ചെയ്തത്. ഇരുവരും ദില്ലിയിൽ താമസിച്ചു വരികയായിരുന്നു. ഇവരുടെ പക്കല്‍ നിന്ന് രണ്ട് ട്രോളി ബാഗുകള്‍, നാല് മൊബൈല്‍ ഫോണുകള്‍, രണ്ട് പാസ്‌പോര്‍ട്ട്, 18000 രൂപ എന്നിവ പിടിച്ചെടുത്തു. 2016 ലാണ് ആബിഗലി ഇന്ത്യയിലെത്തിയത്. തുണിക്കച്ചവടവുമായി ഇവിടെ തുടരുകയായിരുന്നു. 2020 ഇന്ത്യയിലെത്തിയ അഡോണിസ് ഡല്‍ഹിയില്‍ ഒരു ഫുട്കാര്‍ട്ടില്‍ ജോലി ചെയ്യുകയായിരുന്നു എന്നാണ് വിവരം. ബെംഗളൂരു വിമാനത്താവളത്തില്‍ എത്തിയത് മുതല്‍ യുവതികള്‍ പോലീസിന്റെ നിരീക്ഷണത്തിലായിരുന്നു.

കഴിഞ്ഞ വർഷം മംഗളൂരു ഈസ്റ്റ് പോലീസ് സ്‌റ്റേഷനില്‍ നടന്ന ഒരു അറസ്റ്റിനെ തുടര്‍ന്നുള്ള അന്വേഷണമാണ് ഇന്ന് നടന്ന വന്‍ മയക്കുമരുന്ന് വേട്ടയിലെത്തിയത്. ഹൈദര്‍ അലി എന്ന ഒരാളില്‍ നിന്ന് 15 ഗ്രാം എംഡിഎംഎ പിടിച്ചെടുക്കുകയും അയാളെ അറസ്റ്റ് ചെയ്യുകയും ചെയ്തു. ഹൈദര്‍ അലിയെ ചോദ്യം ചെയ്തപ്പോള്‍ ലഭിച്ച ചില വിവരങ്ങളെ തുടര്‍ന്ന് കേസ് സിസിബി യൂണിറ്റിന് കൈമാറി. അവര്‍ നടത്തിയ അന്വേഷണത്തിലാണ് മയക്കുമരുന്ന് സംഘത്തെക്കുറിച്ചുള്ള നിര്‍ണായക വിവരങ്ങള്‍ ലഭിച്ചത്.
6 മാസങ്ങള്‍ക്ക് മുന്‍പ് 6 കിലോഗ്രാം മയക്കുമരുന്നുമായി പീറ്റര്‍ ഇക്കെഡി എന്ന നൈജീരിയന്‍ സ്വദേശി അറസ്റ്റിലായി. ഇയാളിൽ നിന്ന് ദില്ലിയിൽ നിന്ന് ബെംഗളൂരു നഗരത്തിലേക്ക് വിദേശികൾ മുഖേനെ ലഹരി കടത്തുന്നുണ്ടെന്ന സുപ്രധാന വിവരം ലഭിച്ചു. പിന്നാലെ രണ്ട് വിദേശവനിതകള്‍ മയക്കുമരുന്നുമായി എത്തുന്നുവെന്ന രഹസ്യവിവരം ഇക്കഴിഞ്ഞ വെള്ളിയാഴ്ചയാണ് പോലീസിന് ലഭിക്കുന്നത്. തുടര്‍ന്ന് നടത്തിയ പരിശോധനയിലാണ് ദക്ഷിണാഫ്രിക്കൻ സ്വദേശികൾ അറസ്റ്റിലായത്.