കർണ്ണാടകയ്ക്കു നാണക്കേടായി ഐഎഎസ്-ഐപിഎസ് പോര്; രൂപയ്ക്ക് മാനസിക രോഗമെന്നു രോഹിണി; കടുത്തവിമർശനവുമായി ആഭ്യന്തരമന്ത്രി അരഗ ജ്ഞാനേന്ദ്ര

ബെംഗളൂരു : കർണ്ണാടകയ്ക്കു നാണക്കേടായി ഐഎഎസ് ഐപിഎസ് ഉദ്യോഗസ്ഥകളുടെ വാക് പോരിൽ ഒടുവിൽ ആഭ്യന്തര മന്ത്രി ഇടപ്പെടുന്നു. ഐഎഎസ് വനിതാ ഉദ്യോഗസ്ഥയുടെ സ്വകാര്യചിത്രങ്ങൾ വനിതാ ഐപിഎസ് ഉദ്യോഗസ്ഥ പുറത്തുവിട്ടതോടെയാണ് പോര് മുറുകിയത്. രണ്ട് ഉദ്യോഗസ്ഥകൾക്കുമെതിരെ നടപടിയെടുക്കുമെന്ന് സംസ്ഥാന ആഭ്യന്തരമന്ത്രി അരഗ ജ്ഞാനേന്ദ്ര മന്ത്രി കടുത്ത ഭാഷയിലാണ് പറഞ്ഞത്. ‘സാധാരണക്കാർ പോലും തെരുവിൽ ഇങ്ങനെ സംസാരിക്കില്ല. അവരുടെ വ്യക്തിപരമായ കാര്യങ്ങളിൽ അവർ എന്ത് വേണമെങ്കിലും ചെയ്യട്ടെ, പക്ഷേമാദ്ധ്യമങ്ങൾക്ക് മുന്നിൽ വരുന്നത് ശരിയല്ല.’’ മന്ത്രി തുറന്നടിച്ചു സംഭവത്തെക്കുറിച്ച് മുഖ്യമന്ത്രിയോടും പൊലീസ് മേധാവിയോടും ചർച്ച ചെയ്തതായും അദ്ദേഹം പറഞ്ഞു.

കർണ്ണാടക ദേവസ്വം കമ്മിഷണറും ഐഎഎസ് ഉദ്യോഗസ്ഥയുമായ രോഹിണി സിന്ധൂരിയുടെ സ്വകാര്യചിത്രങ്ങളാണ് ഐപിഎസ് ഓഫിസറും കർണാടക കരകൗശല വികസന കോർപറേഷൻ എംഡിയുമായ ഡി.രൂപ ഫെയ്സ്ബുക്കിൽ പോസ്റ്റ് ചെയ്തത്. മേലുദ്യോഗസ്ഥർക്ക് രോഹിണി അയച്ച ചിത്രങ്ങളാണിവ എന്നാണു രൂപയുടെ ആരോപണം. എന്നാൽ തന്റെ വാട്സാപ് സ്റ്റാറ്റസിൽ നിന്നും മറ്റും ശേഖരിച്ച ചിത്രങ്ങളാണു വ്യക്തിഹത്യ ചെയ്യാൻ രൂപ പോസ്റ്റ് ചെയ്തതെന്നും നിയമനടപടി സ്വീകരിക്കുമെന്നും രോഹിണി പ്രതികരിച്ചു. രൂപയ്ക്ക് മാനസിക രോഗമാണെന്നും രോഹിണി ആരോപിച്ചു.