സിനിമാപ്രേമികൾക്ക് വിരുന്നൊരുക്കി ഐഡിപിഎ ഡോക്യുമെന്ററി പ്രദർശനം; തത്ത്വമയി ടിവിയുടെ ബാനറിൽ യദു വിജയകൃഷ്ണൻ സംവിധാനം ചെയ്‌ത ‘ദി ബാറ്റിൽ ഓഫ് കുളച്ചൽ ഉൾപ്പെടെ 9 ഡോക്യുമെന്ററികൾ പ്രേക്ഷകർക്ക് മുന്നിലേക്ക്

ദില്ലി :ഇന്ത്യൻ ഡോക്യുമെന്ററി പ്രൊഡ്യൂസേഴ്സ് അസോസിയേഷന്റെ സഹകരണത്തോടെ സംഘടിപ്പിക്കുന്ന ദ്വിദിന ഡോക്യുമെന്ററി പ്രദർശനം മെയ് 16, 17 തീയതികളിൽ. രാജ്യത്തെ ശ്രദ്ധേയരായ സംവിധായകരുടെ ഒൻപതോളം ഡോക്യുമെന്ററികളാണ് രണ്ട് ദിവസങ്ങളിലായി അരങ്ങേറുന്നത്. വൈകുന്നേരം 7 മണിക്ക് ‘ദി തിയറ്റർ’ എന്ന വേദിയിൽ വെച്ചാണ് പ്രദർശനം നടക്കുക. സാമൂഹിക പ്രസക്തിയുള്ളതും ചരിത്രപരമായ പ്രാധാന്യമുള്ളതുമായ വിവിധ ഭാഷാ ചിത്രങ്ങൾ ഇതിൽ ഉൾപ്പെടുന്നു. തത്ത്വമയി ടിവിയുടെ ബാനറിൽ യദു വിജയകൃഷ്ണൻ സംവിധാനം ചെയ്‌ത കുളച്ചൽ യുദ്ധത്തിന്റെ ചരിത്രം പറയുന്ന ‘ദി ബാറ്റിൽ ഓഫ് കുളച്ചൽ’ ഉൾപ്പെടയുള്ള ഡോക്യൂമെന്ററികളും ഈ പ്രത്യേക പ്രദർശനത്തിൽ ഉൾപ്പെടുത്തിയിട്ടുണ്ട്.

മെയ് 16 ശനിയാഴ്ച അഞ്ച് ചിത്രങ്ങളാണ് പ്രദർശിപ്പിക്കുന്നത്. വിഷ്ണു മോഹനും ദേവേന്ദുവും ചേർന്ന് സംവിധാനം ചെയ്ത ‘സാരി ആൻഡ് സ്ക്രബ്’ (Saree And Scrub) എന്ന മലയാളം ഡോക്യുമെന്ററി അന്ന് പ്രദർശിപ്പിക്കും. തത്ത്വമയി ടിവിയുടെ ബാനറിൽ യദു വിജയകൃഷ്ണൻ സംവിധാനം ചെയ്‌ത ‘ദി ബാറ്റിൽ ഓഫ് കുളച്ചൽ’, പങ്കജ് സെക്സാരിയയുടെ ‘ദി സ്പിന്നിംഗ് എക്സ്പീരിയൻസ്’, രചിത ഗോരവാലയുടെ ‘വിമൺ ഓഫ് മുൻസിയാരി’, റിതേഷ് ജെയിന്റെ ‘കടിയ ധ്രോ: ഗ്രാൻഡ് കാന്യോൺ ഓഫ് ഇന്ത്യ’ എന്നീ ചിത്രങ്ങളും അന്നേ ദിവസം പ്രേക്ഷകർക്ക് മുന്നിലെത്തും.

രണ്ടാം ദിവസമായ മെയ് 17-ന് നാല് ചിത്രങ്ങളാണ് അണിനിരക്കുന്നത്. സച്ചിൻ സുശീലും സൗരഭ് ഖാവ്‌ലെയും ചേർന്ന് സംവിധാനം ചെയ്ത ‘റെയിൽ സിനിമ – എ ജേർണി ത്രൂ സ്റ്റോറീസ്’ എന്ന ഹിന്ദി ചിത്രം ഇതിൽ പ്രധാനപ്പെട്ടതാണ്. വത്സല ശൗക്ലയുടെ ‘നഗർ സ്വരാജ്’, കെ. ഗോപിനാഥിന്റെ ‘തുളസി – മദർ ഓഫ് ഫോറസ്റ്റ്’, അഞ്ജലി സിംഗിന്റെ ‘സംഹാർ’ എന്നിവയാണ് പ്രദർശിപ്പിക്കുന്ന മറ്റ് സിനിമകൾ. വിവിധ പ്രമേയങ്ങളിലൂടെ സഞ്ചരിക്കുന്ന ഈ ഡോക്യുമെന്ററികൾ സിനിമയുടെ ഡോക്യുമെന്ററി ശാഖയെ ഗൗരവമായി കാണുന്നവർക്ക് വലിയൊരു അനുഭവമായിരിക്കുമെന്ന് സംഘാടകർ അറിയിച്ചു.