‘സ്വാതന്ത്ര്യത്തിന് ശേഷം കോൺഗ്രസിനെ പിരിച്ചുവിട്ടിരുന്നെങ്കിൽ രാജ്യം ഇപ്പോൾ 5 പതിറ്റാണ്ട് മുന്നിലെത്തിയേനെ’; കോൺഗ്രസിനെതിരെ ആഞ്ഞടിച്ച് പ്രധാനമന്ത്രി

മുംബൈ: സ്വാതന്ത്ര്യത്തിന് ശേഷം കോൺഗ്രസിനെ പിരിച്ചുവിട്ടിരുന്നെങ്കിൽ രാജ്യം ഇപ്പോൾ 5 പതിറ്റാണ്ട് മുന്നോട്ട് പോകുമായിരുന്നു എന്ന് പ്രധാനമന്ത്രി നരേന്ദ്രമോദി. ദരിദ്രരായ ജനങ്ങൾ ദാരിദ്ര്യത്തിൽ തന്നെ ജീവിക്കണമെന്നാണ് കോൺഗ്രസിന്റെ നയം. എന്നാൽ കഴിഞ്ഞ പത്ത് വർഷത്തിനിടെ 25 കോടിയിലധികം ജനങ്ങളെ ദാരിദ്ര്യത്തിൽ നിന്ന് കരകയറ്റാൻ ബിജെപിക്ക് സാധിച്ചെന്ന് പ്രധാനമന്ത്രി പറഞ്ഞു.
മുംബൈയിൽ സംഘടിപ്പിച്ച പൊതു സമ്മേളനത്തിൽ സംസാരിക്കുകയായിരുന്നു അദ്ദേഹം.

‘ഇന്ത്യക്കാരുടെ കഴിവുകളിൽ വിശ്വാസമില്ലാത്ത സർക്കാർ ഒരു കാലത്ത് രാജ്യം ഭരിച്ചിരുന്നു. സ്വന്തം രാജ്യത്തെ ആളുകളെ അവർ മടിയന്മാരെന്ന് മുദ്രകുത്തി ചെങ്കോട്ടയിൽ നിന്ന് ഉറക്കെ വിളിച്ച് പറയുന്നത് ഞാൻ കേട്ടിട്ടുണ്ട്. ഒരിക്കലും സ്വന്തം രാജ്യത്തെ ആളുകളെ തള്ളി പറയാൻ ഒരു പ്രധാനമന്ത്രിക്കും സാധിക്കില്ല. സ്വാതന്ത്ര്യത്തിന് ശേഷം കോൺഗ്രസിനെ പിരിച്ചുവിട്ടിരുന്നെങ്കിൽ രാജ്യം ഇപ്പോൾ 5 പതിറ്റാണ്ട് മുന്നോട്ട് പോകുമായിരുന്നു’ എന്ന് പ്രധാനമന്ത്രി പറഞ്ഞു.

മോദി നൽകുന്ന വാഗ്ദാനങ്ങൾ പൂർത്തീകരിക്കുന്നില്ലെന്നാണ് കോൺഗ്രസിന്റെ വാദം. എന്നാൽ താൻ നൽകുന്ന വാഗ്ദാനങ്ങൾ പൂർത്തീകരിക്കുന്നുണ്ടെന്ന് ജനങ്ങൾക്ക് നന്നായി അറിയാമെന്നും പ്രധാനമന്ത്രി കൂട്ടിച്ചേർത്തു. അയോദ്ധ്യയിൽ ശ്രീരാമക്ഷേത്രം 500 വർഷങ്ങൾക്ക് ശേഷം പൂർത്തിയായിരിക്കുന്നു. ഇത് മോദി നൽകിയ ഉറപ്പായിരുന്നു. രാജ്യത്തെ ജനങ്ങളെ ദാരിദ്ര്യത്തിൽ നിന്ന് കരകയറ്റാൻ 60 വർഷത്തോളം കോൺഗ്രസ് ശ്രമിച്ചു. എന്നാൽ അവർക്കതിന് സാധിച്ചില്ലെന്നും 10 വർഷം കൊണ്ട് രാജ്യത്തെ 25 കോടി ജനങ്ങളെ ദാരിദ്ര്യത്തിൽ നിന്ന് കരകയറ്റാൻ മോദിക്ക് സാധിച്ചിട്ടുണ്ടെന്നും പ്രധാനമന്ത്രി പറഞ്ഞു.