അടുക്കളയിൽ ഭക്ഷണം മാത്രമല്ല വേണ്ടി വന്നാൽ ആകാശത്തേക്കുള്ള ഉപഗ്രവും ഞങ്ങൾ പെണ്ണുങ്ങൾ ഉണ്ടാക്കും ; പൂർണമായും വനിതകൾ നിർമിച്ച കേരളത്തിലെ ആദ്യത്തെ ഉപഗ്രഹം ‘വീസാറ്റ്’ മായി പൂജപ്പുരയിലെ എൽബിഎസ് വനിതാ എൻജിനീയറിങ് വിദ്യാർത്ഥിനികൾ

തിരുവനന്തപുരം ; അടുക്കളയിൽ പെണ്ണിനെ തളച്ചിടുന്ന സമൂഹത്തിന് ചുട്ട മറുപടിയുമായി എത്തിയിരിക്കുകയാണ് തിരുവനന്തപുരം പൂജപ്പുരയിലെ എൽബിഎസ് വനിതാ എൻജിനീയറിങ് കോളജിലെ ഒരു പറ്റം വിദ്യാർത്ഥിനികൾ .കേരളത്തിലെ കാലാവസ്ഥാ വ്യതിയാനത്തിൽ അൾട്രാ വയലറ്റ് വികിരണങ്ങളുടെ സ്വാധീനം മനസ്സിലാക്കാനായി അടുത്ത പിഎസ്എൽവി റോക്കറ്റ് വിക്ഷേപണത്തോടൊപ്പം ഭ്രമണപഥത്തിലെത്താൻ പോകുന്നത് പൂർണമായും വനിതകൾ നിർമിച്ച കേരളത്തിലെ ആദ്യത്തെ ഉപഗ്രഹമായ ‘വീസാറ്റ്’ ആണ്.

തിരുവനന്തപുരം പൂജപ്പുരയിലെ എൽബിഎസ് വനിതാ എൻജിനീയറിങ് കോളജിലെ സ്പേസ് ക്ലബ്ബിന്റെ നേതൃത്വത്തിലാണ് വിമൻ എൻജിനീയേഡ് സാറ്റലൈറ്റ് (വീസാറ്റ്) നർമിച്ചത്. എൽബിഎസ് കോളജിലെ അസിസ്റ്റന്റ് പ്രഫസർ ഡോ.ലിസി ഏബ്രഹാമിന്റെ നേതൃത്വത്തിൽ മുപ്പതിലധികം വിദ്യാർഥികൾ ഉൾപ്പെടുന്ന വനിതാ സംഘത്തിന്റെ 3 വർഷത്തെ പ്രയത്നമാണ് വീസാറ്റിനു പിന്നിൽ. സംസ്ഥാനത്ത് പൂർണമായും വിദ്യാർഥികൾ മാത്രം ചേർന്നു നിർമിച്ച ആദ്യത്തെ ഉപഗ്രഹവുമിതാണ്. ഉപഗ്രഹ വിക്ഷേപണത്തിനായി ഇന്ത്യൻ ബഹിരാകാശ ഗവേഷണ സ്ഥാപനവുമായി (ഐഎസ്ആർഒ) എൽബിഎസ് കോളജ് ധാരണാപത്രം ഒപ്പുവച്ചിട്ടുണ്ട്. അടുത്ത മാസം അവസാനമോ നവംബർ ആദ്യവാരമോ ആകും അടുത്ത പിഎസ്എൽവി വിക്ഷേപണം നടക്കുക.

കോവിഡ് കാലത്താണ് ഇങ്ങനൊരു ഉപഗ്രഹം നിർമിക്കുന്നതിനുള്ള താൽപര്യം അറിയിച്ച് എൽബിഎസ് വിദ്യാർത്ഥികൾ ഐഎസ്ആർഒയ്ക്ക് കത്തയച്ചത്. വൈകാതെ തന്നെ ഐഎസ്ആർഒ കോളേജുമായി ബന്ധപ്പെടുകയായിരുന്നു. തുടർന്ന് 3 വർഷം കൊണ്ട് വിക്രം സാരാഭായ് സ്പേസ് സെന്ററിന്റെ (വിഎസ്എസ്‌സി) കൂടി സഹകരണത്തോടെ ഉപഗ്രഹം യാഥാർഥ്യമാക്കുകയായിരുന്നു.. ഉപഗ്രഹത്തിൽ നിന്നുള്ള ഡേറ്റ (വിവരങ്ങൾ) ലഭിക്കുന്നതിനുള്ള ഗ്രൗണ്ട് സ്റ്റേഷൻ കോളജ് ക്യാംപസിൽ തന്നെ സ്ഥാപിച്ചിട്ടുണ്ട്. അതു പ്രവർത്തന സജ്ജമാണ്. നമ്മുടെ സംസ്ഥാനത്ത് ഇത്തരത്തിൽ നടക്കുന്ന ആദ്യത്തെ പഠനമാണിതെന്ന് ഡോ.ലിസി ഏബ്രഹാം പറഞ്ഞു.

ബഹിരാകാശത്തിലെയും ഭൗമോപരിതലത്തിലെയും അൾട്രാവയലറ്റ് വികിരണങ്ങളുടെ തോത് അളക്കുന്നതിനും ഇത്തരം വികിരണങ്ങൾക്ക് കേരളത്തിൽ ഉണ്ടായിക്കൊണ്ടിരിക്കുന്ന ഉഷ്ണതരംഗത്തിനും കാലാവസ്ഥാ വ്യതിയാനത്തിനും എത്രമാത്രം സ്വാധീനമുണ്ടെന്നു മനസ്സിലാക്കുകയാണ് പദ്ധതിയുടെ ലക്ഷ്യം.ചന്ദ്രയാൻ 3 വലിയ വിജയമായപ്പോൾ അതിന് ചുക്കാൻ പിടിച്ച ഒട്ടനവധി പെൺ ശക്തികളെ കണ്ട ഭാരതത്തിന് അഭിമാനിക്കാവുന്ന മറ്റൊരു നേട്ടം കൂടിയാണിത് .