ബംഗ്ലാദേശിൽ പാക് സൈന്യം കീഴടങ്ങുന്നതിന്റെ പ്രതീകാത്മക പ്രതിമ തകർത്ത് ഇന്ത്യാവിരുദ്ധർ ; അപലപിച്ച് ശശി തരൂർ ; മുഹമ്മദ് യൂനുസും ഇടക്കാല സർക്കാരും രാജ്യത്ത് ക്രമസമാധാനം പുനഃസ്ഥാപിക്കണമെന്ന് ആവശ്യം

ദില്ലി : ബംഗ്ലാദേശ് വിമോചനത്തിന്റെ സ്മരണയ്ക്കായി സ്ഥാപിച്ച പ്രതിമ തകർത്ത് ഇന്ത്യാ വിരുദ്ധർ. 1971ലെ യുദ്ധത്തിന് ശേഷം പാകിസ്ഥാൻ കീഴടങ്ങിയ നിമിഷം അനുസ്‌മരിപ്പിക്കുന്ന പ്രതിമ തകർക്കപ്പെട്ടതിന്റെ ചിത്രങ്ങൾ ശശി തരൂർ എം പിയാണ് എക്‌സിലൂടെ പങ്കുവച്ചിരിക്കുന്നത്. എല്ലാ വിശ്വാസങ്ങളിലുമുള്ള ബംഗ്ലാദേശികളുടെ താല്പര്യങ്ങൾ കണക്കിലെടുത്ത് മുഹമ്മദ് യൂനുസും ഇടക്കാല സർക്കാരും രാജ്യത്ത് ക്രമസമാധാനം പുനഃസ്ഥാപിക്കേണ്ടത് അത്യാവശ്യമെന്നും ശശി തരൂർ എക്‌സിൽ കുറിച്ചു.

ഷഹീദ് മെമ്മോറിയൽ കോംപ്ളക്‌സ്, മുജിബ്‌നഗർ എന്നിവിടങ്ങളിലെ പ്രതിമകൾ തകർക്കപ്പെട്ട നിലയിൽ കാണുന്നതിൽ സങ്കടമുണ്ട്. ഇന്ത്യൻ സാംസ്കാരിക കേന്ദ്രങ്ങൾ, ക്ഷേത്രങ്ങൾ, ഹിന്ദുക്കളുടെ വീടുകൾ എന്നിവയ്ക്ക് നേരെ പലയിടത്തും ആക്രമണങ്ങൾ ഉണ്ടായതിനെ തുടർന്നാണ് ഇതും സംഭവിച്ചിരിക്കുന്നത്. ചില പ്രതിഷേധക്കാരുടെ അജണ്ട വ്യക്തമാണെന്നും ശശി തരൂർ പറയുന്നു.

എല്ലാ വിശ്വാസങ്ങളിലുമുള്ള ബംഗ്ലാദേശികളുടെ താല്പര്യങ്ങൾ കണക്കിലെടുത്ത് മുഹമ്മദ് യൂനുസും ഇടക്കാല സർക്കാരും രാജ്യത്ത് ക്രമസമാധാനം പുനഃസ്ഥാപിക്കേണ്ടത് അത്യാവശ്യമാണ്. ഈ സംഘർഷ സമയത്ത് ഇന്ത്യ ബംഗ്ലാദേശിലെ ജനങ്ങൾക്കൊപ്പമുണ്ട്. എന്നിരുന്നാലും ഈ അരാജകത്വ നടപടികൾ അംഗീകരിക്കാനാവില്ലെന്നും ശശി തരൂർ എക്‌സിൽ കുറിച്ചു.