സന്നിധാനത്ത് മരണങ്ങളുണ്ടായാൽ മൃതദേഹം താഴെയെത്തിക്കാൻ ആംബുലൻസ് ഉപയോഗിക്കണം !സ്ട്രച്ചറിൽ ഇറക്കരുത് ; ഉത്തരവുമായി ഹൈക്കോടതി ദേവസ്വം ബെഞ്ച്

പത്തനംതിട്ട : ശബരിമലയില്‍ മരണങ്ങളുണ്ടായാല്‍ മൃതദേഹം സ്ട്രച്ചറിൽ താഴെയിറക്കരുതെന്ന് ഹൈക്കോടതി. പകരം ആംബുലന്‍സുകള്‍ ഉപയോഗിക്കണമെന്നാണ് നിർദേശം. അസുഖബാധിതരായവരെ താഴെ ഇറക്കാന്‍ നേരത്തേതന്നെ ആംബുലന്‍സ് സംവിധാനമുണ്ട്. ഈ സംവിധാനങ്ങള്‍ ഉപയോഗിക്കണമെന്നും മൃതദേഹങ്ങള്‍ സ്‌ട്രെച്ചറില്‍ ചുമന്ന് താഴെയിറക്കരുതെന്നുമാണ് കോടതി വ്യക്തമാക്കിയിരിക്കുന്നത്. ശബരിമലയിലേക്ക് തീര്‍ഥാടകര്‍ മുകളിലേക്ക് കയറുമ്പോള്‍ അതിന് തൊട്ടടുത്തുകൂടി മൃതദേഹങ്ങള്‍ താഴെയിറക്കുന്നത് തീർത്ഥാടകർക്ക് മാനസിക വിഷമവും ബുദ്ധിമുട്ടുമുണ്ടാക്കുന്നത് ചൂണ്ടിക്കാട്ടിയാണ് നടപടി.

ശബരിമലയില്‍ ഓരോ മണ്ഡല മകരവിളക്ക് തീർത്ഥാടന കാലത്തും 150-ഓളം പേര്‍ക്കെങ്കിലും ഹൃദയാഘാതം ഉണ്ടാകാറുണ്ടെന്നാണ് കണക്കാക്കപ്പെടുന്നത്. നാല്‍പ്പതോളം പേര്‍ക്ക് ജീവന്‍ നഷ്ടമാകാറുമുണ്ട്. എന്നാൽ, മൃതദേഹങ്ങള്‍ സന്നിധാനത്തെ സര്‍ക്കാര്‍ ആശുപത്രികയിൽനിന്ന് സ്‌ട്രെച്ചറില്‍ ചുമന്ന് താഴെ ഇറക്കുകയാണ് ചെയ്യാറുള്ളത്. ഇനിമുതൽ അങ്ങനെ ചെയ്യരുതെന്നാണ് ഹൈക്കോടതി നിര്‍ദേശിച്ചിരിക്കുന്നത്.