വിവാഹത്തിനു സമ്മര്‍ദം ചെലുത്താന്‍ മുന്‍കാമുകിയുടെ മോശം ചിത്രങ്ങൾ ഫോൺ നമ്പർ അടക്കം സമൂഹ മാദ്ധ്യമങ്ങളിൽ പ്രചരിപ്പിച്ചു; ദില്ലിയിൽ യുവാവ് അറസ്റ്റിൽ

ദില്ലി : മുൻകാമുകിയെ വിവാഹത്തിനായി സമ്മർദ്ദം ചെലുത്തുന്നതിനായി വ്യാജ അക്കൗണ്ട് ഉണ്ടാക്കി അവരുടെ മോശം ചിത്രങ്ങളും ദൃശ്യങ്ങളും സമൂഹ മാദ്ധ്യമത്തിൽ പ്രചരിപ്പിച്ച യുവാവ് പോലീസ് പിടിയിലായി. ദില്ലി സാകേത് സ്വദേശി കുമാർ അവിനാഷ് (24) ആണ് അറസ്റ്റിലായത്. യുവതിക്കും കുടുംബത്തിനും മാനഹാനിയുണ്ടാക്കി, സമ്മർദ്ദം ചെലുത്തി വിവാഹം കഴിക്കാനായിരുന്നു പ്രതിയുടെ ശ്രമം.

യുവതിക്കും കുടുംബത്തിനും മാനഹാനിയുണ്ടാക്കി സമ്മർദ്ദം ചെലുത്തി വിവാഹം കഴിക്കാനായി പെൺകുട്ടിയുടേയും അമ്മയുടേയും ഫോൺ നമ്പർ സഹിതമാണ് ഇയാൾ മോശം ഫോട്ടോകളും വീഡിയോകളും സമൂഹ മാദ്ധ്യമങ്ങളിലൂടെ പ്രചരിപ്പിച്ചത്. ഒരാഴ്ചയായി ഫോണുകളും മെസേജുകളും വന്നതിനെ തുടർന്നാണ് യുവതി പൊലീസിൽ പരാതി നൽകിയത്. തുടർന്ന് ഐപി വിലാസം കേന്ദ്രീകരിച്ച് പോലീസ് നടത്തിയ പരിശോധനയിലാണ് പ്രതിയെ വലയിലായത്.

കോളേജ് പഠന കാലത്ത് യുവാവും പെൺകുട്ടിയും പ്രണയത്തിലായിരുന്നു. എന്നാൽ വീട്ടുകാരുടെ എതിർപ്പിനെ തുടർന്ന് പെൺകുട്ടി ബന്ധത്തിൽ നിന്ന് പിൻമാറി. തുടർന്നാണ് പെൺകുട്ടിയെ സ്വന്തമാക്കാൻ ഇയാൾ ക്രൂരമായ വഴി കണ്ടെത്തിയത്. ഇയാൾ കുറ്റകൃത്യത്തിനുപയോഗിച്ച മൊബൈൽ ഫോണും, ലാ‌പ്‌ടോപും പൊലീസ് പിടിച്ചെടുത്തു.