രാജ്യത്ത് ക്രിസ്തുമത വിശ്വാസികൾ ആക്രമിക്കപ്പെടുന്ന സംഭവങ്ങൾ കുറഞ്ഞു : കേന്ദ്ര ന്യൂനപക്ഷ സഹമന്ത്രി

കൊച്ചി: രാജ്യത്ത് ക്രിസ്തുമത വിശ്വാസികൾ ആക്രമിക്കപ്പെടുന്ന സംഭവങ്ങൾ വളരെയധികം കുറഞ്ഞെന്ന് കേന്ദ്ര ന്യൂനപക്ഷകാര്യ സഹമന്ത്രി ജോൺ ബാർല വ്യക്തമാക്കി. ക്രിസ്ത്യാനികൾ ഏതെങ്കിലും തരത്തിലുള്ള ബുദ്ധിമുട്ടുകൾ അനുഭവിക്കുന്നുണ്ടെങ്കിൽ കേന്ദ്രത്തിന്റെ ശ്രദ്ധയിൽപ്പെടുത്തണമെന്നും അത് പരിഹരിക്കപ്പെടുമെന്നും അദ്ദേഹം പറഞ്ഞു. ക്രിസ്ത്യൻ സഭകളുമായുള്ള ചർച്ചകൾക്കായി കേരളത്തിൽ എത്തിയതായിരുന്നു അദ്ദേഹം.

കേരളത്തിലെത്തിയ മന്ത്രി ബിജെപി നേതാക്കന്മാർക്കൊപ്പം മലയാറ്റൂരിലെ സെന്റ് തോമസ് പള്ളി സന്ദർശിക്കുകയും പുരോഹിതർക്കൊപ്പം പ്രഭാതഭക്ഷണം കഴിക്കുകയും ചെയ്തു. ബിജെപി നേതാവ് എ.എൻ. രാധാകൃഷ്ണൻ അടക്കമുള്ളവരും പള്ളിയിൽ സന്നിഹിതരായിരുന്നു. ഇതിന് ശേഷം ചാലക്കുടിയിലെ ഡിവൈൻ ധ്യാനകേന്ദ്രവും മന്ത്രി സന്ദർശിച്ചു. രണ്ടു സ്ഥലത്തും കേന്ദ്ര സർക്കാരിന്റെ പുതിയ പദ്ധതികളെക്കുറിച്ചും മറ്റും സംസാരിച്ചുവെന്ന് മന്ത്രി ട്വീറ്റ് ചെയ്തു.