മലനിരകളിലും മരുഭൂമിയിലും കരുത്തുകാട്ടി ഇന്ത്യ-യു.എസ് സൈന്യങ്ങള്‍. യുദ്ധ് അഭ്യാസ് 2026ന് തുടക്കം

ദില്ലി : ഇന്ത്യയും അമേരിക്കയും തമ്മിലുള്ള സംയുക്ത സൈനികാഭ്യാസമായ ‘യുദ്ധ് അഭ്യാസ് 2026’ (Yudh Abhyas 2026) ഉത്തരാഖണ്ഡിലും രാജസ്ഥാനിലുമായി ആരംഭിച്ചു. ചരിത്രത്തിലാദ്യമായാണ് ഈ സൈനിക പരിശീലനം ഒരേസമയം രണ്ട് വ്യത്യസ്ത വേദികളിലായി നടക്കുന്നത്. രണ്ടാഴ്ച നീണ്ടുനില്‍ക്കുന്ന ഈ സൈനിക അഭ്യാസത്തില്‍ ഇരു രാജ്യങ്ങളില്‍ നിന്നും 600-ഓളം സൈനികര്‍ വീതം പങ്കെടുക്കുന്നുണ്ട്.

ഉത്തരാഖണ്ഡിലെ ഔലിയില്‍ പര്‍വ്വത യുദ്ധമുറകളും ശീതകാല പ്രതിരോധ പ്രവര്‍ത്തനങ്ങളും നടക്കുമ്പോള്‍, രാജസ്ഥാനിലെ ജൈസാല്‍മീര്‍ മഹാജന്‍ ഫീല്‍ഡ് ഫയറിങ് റേഞ്ചില്‍ മരുഭൂമിയിലെ യുദ്ധമുറകളും ആധുനിക ആയുധ പ്രകടനങ്ങളുമാണ് നടക്കുന്നത്. യു.എസ് ആര്‍മിയുടെ അലാസ്‌ക ആസ്ഥാനമായുള്ള 11-ാമത് എയര്‍ബോണ്‍ ഡിവിഷനും, തേര്‍ഡ് മള്‍ട്ടി-ഡൊമെയ്ന്‍ ടാസ്‌ക് ഫോഴ്‌സും ഈ അഭ്യാസത്തില്‍ പങ്കുചേരുന്നുണ്ട്. രാജസ്ഥാന്‍ ഘട്ടത്തില്‍ ഡ്രോണുകളുടെ ഉപയോഗം, ഓട്ടോണമസ് നിരീക്ഷണ സംവിധാനങ്ങള്‍, സ്റ്റിംഗര്‍ മിസൈലുകള്‍, എം-ലിഡ്‌സ് (M-LIDS) പ്രതിരോധ സംവിധാനം എന്നിവ പ്രദര്‍ശിപ്പിക്കും.

ഇരു സൈന്യങ്ങളും തമ്മിലുള്ള പരസ്പര സഹകരണവും (Interoperability) സങ്കീര്‍ണ്ണമായ മള്‍ട്ടി-ഡൊമെയ്ന്‍ ഓപ്പറേഷനുകള്‍ നടപ്പിലാക്കാനുള്ള ശേഷിയും വര്‍ദ്ധിപ്പിക്കുക എന്നതാണ് ഇതിന്റെ പ്രധാന ലക്ഷ്യം. സെപ്റ്റംബര്‍ 28 വരെ നീണ്ടുനില്‍ക്കുന്ന ഈ അഭ്യാസം ഇന്ത്യ-യു.എസ് പ്രതിരോധ പങ്കാളിത്തത്തിലെ സുപ്രധാന നാഴികക്കല്ലായാണ് വിലയിരുത്തപ്പെടുന്നത്.