ഡാര്‍ക്ക് പാറ്റേണ്‍ തട്ടിപ്പ്. റാപ്പിഡോയ്ക്ക് 10 ലക്ഷം രൂപ പിഴയിട്ട് കേന്ദ്രം

ദില്ലി : റൈഡ് ബുക്ക് ചെയ്യുമ്പോള്‍ തെറ്റിദ്ധരിപ്പിക്കുന്ന രീതിയില്‍ അധിക തുക ഈടാക്കാന്‍ ശ്രമിച്ചതിന് പ്രമുഖ ബൈക്ക്-ടാക്‌സി അഗ്രഗേറ്ററായ റാപ്പിഡോയ്ക്ക് എതിരെ കേന്ദ്ര നടപടി. തെറ്റിദ്ധരിപ്പിക്കുന്ന പരസ്യങ്ങള്‍ക്കും അന്യായ വ്യാപാര രീതികള്‍ക്കും കേന്ദ്ര ഉപഭോക്തൃ സംരക്ഷണ അതോറിറ്റിയാണ് (CCPA) 10 ലക്ഷം രൂപ പിഴ ചുമത്തിയത്. 2025 മെയ് 16-ന് ലഭിച്ച പരാതിയെ തുടര്‍ന്നാണ് റാപ്പിഡോ ഉള്‍പ്പെടെയുള്ള വിവിധ ക്യാബ്, ബൈക്ക്-ടാക്‌സി അഗ്രഗേറ്റര്‍മാരെ സി.സി.പി.എ പരിശോധിച്ചത്.

റാപ്പിഡോ ആദ്യം കുറഞ്ഞ യാത്രാനിരക്ക് പ്രദര്‍ശിപ്പിച്ച ശേഷം, ഉപഭോക്താവ് ബുക്കിംഗുമായി മുന്നോട്ട് പോകുമ്പോള്‍ അധിക തുക നല്‍കാന്‍ പ്രേരിപ്പിക്കുന്ന സന്ദേശങ്ങള്‍ ആപ്പില്‍ കാണിച്ചിരുന്നു. ’60 രൂപ നിരക്കില്‍ ഡ്രൈവര്‍മാര്‍ യാത്ര സ്വീകരിക്കുന്നില്ല; +10, +20, +30 എന്നിങ്ങനെ തുക കൂട്ടി നോക്കൂ, നിരക്ക് കൂടുന്തോറും യാത്ര ലഭിക്കാനുള്ള സാധ്യതയും കൂടും” – തുടങ്ങിയ സന്ദേശങ്ങള്‍ നല്‍കിയാണ് ഉപഭോക്താക്കളെ കബളിപ്പിച്ചത്.

ടിപ്പ് നല്‍കുന്നത് തികച്ചും സ്വമേധയാ ഉള്ള കാര്യമാണെന്നും, അധിക തുക വാഗ്ദാനം ചെയ്തില്ലെങ്കിലും യാത്രക്കാരെയും ഡ്രൈവര്‍മാരെയും ബന്ധിപ്പിക്കുന്ന സംവിധാനം സാധാരണ പോലെ പ്രവര്‍ത്തിക്കുന്നുണ്ടെന്നുമായിരുന്നു റാപ്പിഡോയുടെ വാദം. എന്നാല്‍ ഈ വാദം സി.സി.പി.എ അംഗീകരിച്ചില്ല. അഡ്വാന്‍സ്-ടിപ്പിംഗ്, ‘ഡാര്‍ക്ക്-പാറ്റേണ്‍’ രീതികള്‍ എന്നിവയുമായി ബന്ധപ്പെട്ട് ഊബര്‍, ഓല, റാപ്പിഡോ, നമ്മ യാത്രി തുടങ്ങിയ പ്രമുഖ അഗ്രഗേറ്റര്‍മാര്‍ക്കും കേന്ദ്ര ഉപഭോക്തൃ സംരക്ഷണ അതോറിറ്റി നേരത്തെ നോട്ടീസ് നല്‍കിയിരുന്നു.