പുതിയ രാഷ്ട്രപതി ആരാകുമെന്ന് കാതോർത്ത് ഇന്ത്യ; തെരഞ്ഞെടുപ്പ് നാളെ; വോട്ടെണ്ണൽ ജൂലൈ 21ന്; വിജയമുറപ്പിച്ച് എൻഡിഎ

ദില്ലി: ഇന്ത്യയിലെ പ്രഥമ പൗരനെ തെരഞ്ഞെടുക്കാനുള്ള തെരഞ്ഞെടുപ്പ് നാളെ. ജാർഖണ്ഡ് മുന്‍ ഗവർണറർ ദ്രൗപദി മുർമുവാണ് എന്‍ഡിഎയുടെ സ്ഥാനാർത്ഥി. അറുപത് ശതമാനത്തിലധികം വോട്ടുകൾ ഇതിനോടകം എന്‍ഡിഎ സ്ഥാനാർത്ഥി ഉറപ്പാക്കിയിട്ടുണ്ട്. കൂടാതെ ലോക്സഭാ, നിയമസഭാ ഉപതെരഞ്ഞെടുപ്പുകളിൽ ബിജെപിക്കുണ്ടായ വിജയവും മഹാരാഷ്‌ട്രയിൽ ബിജെപി-ശിവസേന സഖ്യം അധികാരത്തിലേറിയതും മുർമൂവിന് വോട്ട് വർദ്ധിപ്പിക്കും. വനവാസി സമൂഹത്തിൽ നിന്നുള്ള ഒരു വനിത സ്വതന്ത്ര ഭാരതത്തിന്റെ രാഷ്‌ട്രപതിയായി തെരഞ്ഞെടുക്കപ്പെടുന്ന സുവർണ്ണ മുഹൂർത്തനത്തിനായാണ് രാജ്യം കാത്തിരിക്കുന്നത്. അതേസമയം എതിർ സ്ഥാനാർത്ഥി യശ്വന്ത് സിന്‍ഹയാണ്. തിങ്കളാഴ്ച പാർലമെന്‍റ് വർഷകാല സമ്മേളനം തുടങ്ങാനിരിക്കെ എന്‍ഡിഎയുടെ പാർലമെന്‍ററി പാർട്ടി യോഗവും ഇന്ന് ചേരുന്നുണ്ട്. ദില്ലിയിലെ ബിജെപി ആസ്ഥാനത്ത് നടക്കുന്ന യോഗത്തില്‍ രാഷ്ട്രപതി തിരഞ്ഞെടുപ്പിന്‍റെ മോക് ഡ്രില്ലും നടത്തും. പ്രതിപക്ഷ പാർട്ടികളും ഇന്ന് യോഗം ചേരുന്നുണ്ട്.

വോട്ടെടുപ്പ് നടക്കുന്നത് നാളെ രാവിലെ 10 മുതൽ വൈകിട്ട് 5 വരെ പാർലമെന്റ് ഹൗസിലെ റൂം നമ്പർ 63 ലും സംസ്ഥാന അസംബ്ലികളിലെ വിജ്ഞാപനം ചെയ്ത മുറികളിലുമാണ് . പാർലമെന്റിലെ ഇരു സഭകളിലെയും തെരഞ്ഞെടുക്കപ്പെട്ട അം​ഗങ്ങളും ഡൽഹിയും പുതുച്ചേരിയും ഉൾപ്പെടെ സംസ്ഥാനങ്ങളിലെ തെരഞ്ഞെടുക്കപ്പെട്ട നിയമസഭാ സമാജികരുമാണ് ഇലക്ടറൽ കോളേജിൽ ഉൾപ്പെടുന്നത്. വോട്ടെണ്ണൽ നടക്കുന്നത് ജൂലൈ 21 നാണ്.