പാകിസ്ഥാനെ ഐക്യരാഷ്ട്ര സഭയിൽ തെമ്മാടി രാജ്യമെന്ന് വിശേഷിപ്പിച്ച് ഇന്ത്യ; ലോകരാജ്യങ്ങൾക്ക് നടുവിൽ നാണം കെടുത്തിയത് ഇന്ത്യയുടെ സ്ഥിരം പ്രതിനിധി യോജന പട്ടേൽ; പാക് വിമാനങ്ങൾക്കും കപ്പലുകൾക്കും വിലക്കേർപ്പെടുത്തി കൂടുതൽ കടുത്ത നടപടി

ദില്ലി: ഐക്യരാഷ്ട്ര സഭയിൽ പാകിസ്ഥാനെ തെമ്മാടി രാജ്യമെന്ന് വിശേഷിപ്പിച്ച് ഇന്ത്യ. തിങ്കളാഴ്ച്ച നടന്ന ഭീകര വിരുദ്ധ ചർച്ചയിലാണ് പാകിസ്ഥാനെ ഇന്ത്യയുടെ സ്ഥിരം പ്രതിനിധി യോജന പട്ടേൽ കടന്നാക്രമിച്ചത്. ഇന്ത്യയ്‌ക്കെതിരായ അടിസ്ഥാന രഹിതമായ പ്രചാരണങ്ങൾ നടത്താൻ പാകിസ്ഥാൻ ഐക്യരാഷ്ട്ര സഭയുടെ ഈ വേദി ഉപയോഗിക്കുന്നു. ഭീകര സംഘടനകളെ പിന്തുണയ്ക്കുകയും പരിശീലിപ്പിക്കുകയും ധനസഹായം നൽകുകയും ചെയ്യുന്ന പാകിസ്ഥാന്റെ ചരിത്രം അവരുടെ മന്ത്രി തന്നെ വെളിപ്പെടുത്തി. ആഗോള ഭീകരതയെ പ്രോത്സാഹിപ്പിക്കുന്ന തെമ്മാടി രാജ്യമാണ് പാകിസ്ഥാനെന്നും ലോകത്തിന് ഈ വസ്തുതയ്ക്ക് നേരെ ഇനി കണ്ണടയ്ക്കാൻ കഴിയില്ലെന്നും പട്ടേൽ ആഞ്ഞടിച്ചു.

2022 ൽ ഐക്യരാഷ്ട്ര സഭ സംഘടിപ്പിച്ച വേൾഡ് വിക്‌ടിംസ് കോൺഗ്രസ് ഓഫ് ടെററിസത്തെ കുറിച്ചുള്ള ചർച്ചകളാണ് തിങ്കളാഴ്ച്ച യു എൻ ആസ്ഥാനത്ത് നടന്നത്. അതെ സമയം പഹൽഗാം ഭീകരാക്രമണവുമായി ബന്ധപ്പെട്ട് പാകിസ്ഥാനെതിരെ നടപടി കടുപ്പിക്കുകയാണ് ഇന്ത്യ. പാകിസ്ഥാൻ വിമാനങ്ങൾക്കും കപ്പലുകൾക്കും ഇന്ത്യ വിലക്ക് ഏർപ്പെടുത്തി. നേരത്തെ പാകിസ്ഥാൻ വ്യോമമേഖല ഇന്ത്യൻ വിമാനങ്ങൾക്ക് നിഷേധിച്ചിരുന്നു.

ഭീകരാക്രമണത്തിൽ പാക് സംഘടനകളുടെ പങ്ക് വ്യക്തമായതോടെ പാകിസ്ഥാനെതിരെ സൈനിക നടപടിക്കൊരുങ്ങുകയാണ് ഇന്ത്യ. ശക്തമായ തിരിച്ചടി നൽകുമെന്ന് ഇന്ത്യൻ പ്രധാനമന്ത്രിയും വിദേശകാര്യ മന്ത്രിയും വ്യക്തമാക്കി. രാജ്യത്ത് കനത്ത ജാഗ്രതാ നിർദ്ദേശം പ്രഖ്യാപിച്ചിട്ടുണ്ട്. പ്രതിരോധ ദേശസുരക്ഷാ പരമായ കാര്യങ്ങൾ തത്സമയ സംപ്രേക്ഷണം പാടില്ലെന്ന് മാധ്യമങ്ങൾക്ക് കേന്ദ്ര സർക്കാർ നിർദ്ദേശവും നൽകിയിട്ടുണ്ട്.