ഭീകരരുടെ ‘ഹ്യൂമൻ ജിപിഎസ്’ ബാഗു ഖാനെ വധിച്ച് ഇന്ത്യൻ സൈന്യം ! നുഴഞ്ഞുകയറ്റത്തിന് കനത്ത തിരിച്ചടി

ശ്രീനഗർ : പാക് അധീന കശ്മീർ കേന്ദ്രീകരിച്ച് ഇന്ത്യയിലേക്ക് ഭീകരരുടെ നുഴഞ്ഞുകയറ്റം സുഗമമാക്കാൻ സഹായിച്ചിരുന്ന സമന്ദർ ചാച്ച എന്നറിയപ്പെടുന്ന ബാഗു ഖാനെ സുരക്ഷാ സേന വധിച്ചു. ഭീകരസംഘടനകൾക്കിടയിൽ ‘ഹ്യൂമൻ ജിപിഎസ്’ എന്നറിയപ്പെട്ടിരുന്ന ഇയാളെ ഗുരെസ് മേഖലയിലുണ്ടായ ഏറ്റുമുട്ടലിലാണ് സൈന്യം വധിച്ചത്.

1995 മുതൽ പാക് അധീന കശ്മീർ താവളമാക്കി ഭീകരപ്രവർത്തനങ്ങൾക്ക് സഹായം ചെയ്തുകൊണ്ട് ബാഗു ഖാൻ പ്രവർത്തിച്ചുവരികയായിരുന്നു. നുഴഞ്ഞുകയറ്റത്തിന് ആവശ്യമായ രഹസ്യ വഴികളും ദുർഘടമായ ഭൂപ്രദേശങ്ങളിലെ ഒളിത്താവളങ്ങളും കൃത്യമായി മനസ്സിലാക്കി ഭീകരർക്ക് വഴി കാണിക്കുന്നതിൽ ഇയാൾ പ്രധാന പങ്കുവഹിച്ചു. നൗഷേര നാർ മേഖലയിൽ ഒരു ഭീകരനോടൊപ്പം ഇന്ത്യയിലേക്ക് നുഴഞ്ഞുകയറാനുള്ള ശ്രമത്തിനിടെയാണ് ഇയാൾ സുരക്ഷാ സേനയുടെ വെടിയേറ്റ് മരിച്ചത്.

ഗുരെസ് സെക്ടറിലെ വിവിധ ഭാഗങ്ങളിൽ നിന്ന് നൂറിലധികം നുഴഞ്ഞുകയറ്റ ശ്രമങ്ങൾക്ക് ഇയാൾ സൗകര്യമൊരുക്കിയിരുന്നതായി സുരക്ഷാ ഏജൻസികൾ പറയുന്നു. നിയന്ത്രണ രേഖയ്ക്ക് സമീപമുള്ള ഗുരെസിലും സമീപ പ്രദേശങ്ങളിലും നുഴഞ്ഞുകയറ്റങ്ങൾ ആസൂത്രണം ചെയ്യാനും നടപ്പിലാക്കാനും ഭീകരസംഘടനകളെ സഹായിച്ചിരുന്നത് ബാഗു ഖാനാണ്. പ്രദേശത്തെ ഭൂമിശാസ്ത്രപരമായ പ്രത്യേകതകളെക്കുറിച്ച് ആഴത്തിലുള്ള അറിവുണ്ടായിരുന്നതിനാലാണ് ഭീകരർ ഇയാളെ ‘ഹ്യൂമൻ ജിപിഎസ്’ എന്ന് വിശേഷിപ്പിച്ചത്.

വർഷങ്ങളോളം സുരക്ഷാ സേനയുടെ കണ്ണുവെട്ടിച്ച് ഒളിവിൽ കഴിഞ്ഞാണ് ബാഗു ഖാൻ ഭീകരപ്രവർത്തനങ്ങൾക്ക് ഒത്താശ ചെയ്തിരുന്നത്. ഇയാളെ പിടികൂടാൻ സൈന്യം പലതവണ ശ്രമങ്ങൾ നടത്തിയിരുന്നെങ്കിലും വിജയിച്ചിരുന്നില്ല. ബാഗു ഖാന്റെ മരണം, ഈ മേഖലയിലെ ഭീകര സംഘടനകളുടെ പ്രവർത്തനങ്ങൾക്കും സാമഗ്രികൾ എത്തിക്കാനുള്ള അവരുടെ ശൃംഖലയ്ക്കും വലിയ തിരിച്ചടിയായാണ് വിലയിരുത്തപ്പെടുന്നത്. അതിർത്തിയിൽ ഇന്ത്യൻ സേനയുടെ നിരീക്ഷണം കൂടുതൽ ശക്തമാക്കിയതായും ഭീകരർക്കെതിരെയുള്ള നടപടികൾ തുടരുമെന്നും അധികൃതർ അറിയിച്ചു.