അന്തർസംസ്ഥാന ഹൈടെക് കള്ളൻ തിരുവനന്തപുരം വിമാനത്താവളത്തിൽ പിടിയിൽ, ശ്രീപദ്മനാഭ സ്വാമി ക്ഷേത്രം അടക്കം തന്ത്രപ്രധാന സ്ഥലങ്ങൾ സന്ദർശിച്ചതായി സൂചന!

തിരുവനന്തപുരം: വിമാനത്തിലെത്തി ഓട്ടോയിൽ കറങ്ങി നടന്ന് സ്വർണ്ണം മോഷ്ടിക്കുന്ന ഹൈടെക്ക് കള്ളൻ ഒടുവിൽ പിടിയിൽ. പെരുംകള്ളൻ പിടിയിലായതിന്‍റെ ആശ്വാസത്തിലാണ് തലസ്ഥാന ജില്ല. തിരുവനന്തപുരത്ത് മൂന്ന് മോഷണ പരമ്പര നടത്തിയ തെലങ്കാന ഖമ്മം സ്വദേശി സമ്പതി ഉമാപ്രസാദാണ് കഴിഞ്ഞ് ദിവസം വിമാനത്താവളത്തിൽ വച്ച് പോലീസിന്റെ വലയിൽ വീണത്. കേരളത്തിലേക്ക് വീണ്ടും വരുന്നതിനിടെയാണ് ഇയാള്‍ പിടിക്കപ്പെട്ടത്.

ഹൈടെക്ക് കള്ളനാണ് ഉമപ്രസാദ്. ആറ് ലക്ഷം രൂപയുടെ സ്വർണ്ണം മോഷ്ടിക്കാൻ നടത്തിയത് നാല് വിമാന യാത്രകളാണ്. ഹോട്ടലിൽ താമസിച്ച്, ഓട്ടോയിൽ കറങ്ങി, മോഷണം നടത്തി മടങ്ങുന്നതാണ് ഇയാളുടെ രീതി. മേയ് 28ന് തിരുവനന്തപുരത്തെത്തി ശ്രീപത്മനാഭസ്വാമി ക്ഷേത്രവും ടൂറിസ്റ്റ് കേന്ദ്രങ്ങളും സന്ദർശിച്ചു. ഒപ്പം കയറേണ്ട, ആളില്ലാത്ത വീടുകളും നോക്കിവെച്ചു. അഞ്ച് ദിവസം കഴിഞ്ഞ് മടങ്ങി. നാല് ദിവസം കഴിഞ്ഞ് ജൂൺ ആറിന് വിമാനം കയറി വീണ്ടുമെത്തി.

മൂന്ന് വീടുകളിൽ നിരനിരയായി മോഷണം പൂർത്തിയാക്കി ഈ മാസം ഒന്നിന് തിരിച്ചുപോയി. വിരലടയാളം പതിയാതിരിക്കാൻ കയ്യുറ, രൂപവും മുഖവും തിരിച്ചറിയാതിരിക്കാൻ ഓവർകോട്ടും ധരിച്ചാണ് ഇയാൾ കവര്‍ച്ചകള്‍ക്ക് എത്തിയിരുന്നത്. പോലീസിനെ വെള്ളം കുടിപ്പിച്ച ഈ മോഷ്ടാവിലേക്കെത്താൻ സിസിടിവി ദൃശ്യങ്ങളാണ് സഹായിച്ചത്. ഇയാൾ കയറിയ ഓട്ടോയിലെ ഡ്രൈവർ നൽകിയ വിവരമാണ് നിർണായകമായത്. ഹോട്ടലുകളിൽ നൽകിയ വിലാസവും വിമാന ടിക്കറ്റുകളും തപ്പിച്ചെന്നാണ് ഇയാളെ പിടിച്ചത്.

സ്വർണ്ണം മാത്രമേ മോഷ്ടിക്കൂ എന്നത് മാത്രമല്ല, പണയം വെച്ച് കിട്ടുന്ന പണമാണ് ഇയാള്‍ ചെലവഴിച്ചിരുന്നത്. പോലീസിനെക്കുറിച്ചും നേരത്തെ ഇയാൾ മനസ്സിലാക്കിയിട്ടുണ്ട്. പുലർച്ചെ തിരുവനന്തപുരം വിമാനത്താവളത്തിൽ വന്നിറങ്ങിയത് പോലീസിന്റെ കൈയിലേക്കാണ്. ഉമാപ്രസാദ് മോഷ്ടിച്ച സ്വർണ്ണം ഒച്ചിപ്പിച്ചിരുന്നത് ചാക്ക പാലത്തിനടിയിലായിരുന്നു.

ഈ സ്വർണ്ണം വിൽക്കാനാണ് കഴിഞ്ഞ ദിവസം രാവിലെ തെലങ്കാനയിൽ നിന്നുമെത്തിയത്. ജനൽ കമ്പിമുറിക്കാനായി ഉപയോഗിച്ച കട്ടറും കണ്ടെത്തി. പർവതാരോഹണത്തിൽ താൽപര്യമുള്ളയാളാണ് പ്രതിയെന്ന് പോലീസ് പറയുന്നു. ചെറുപ്പം മുതലേ കുറ്റകൃത്യം പതിവാക്കിയ ആളുമാണ്. കൂടുതൽ മോഷണങ്ങൾ നടത്തിയോ എന്നത് കൂടുതൽ ചോദ്യം ചെയ്യലിൽ വ്യക്തമാകുമെന്നും പോലീസ് പറഞ്ഞു.