ധനുഷ് രാഷ്ട്രീയത്തിലേക്ക്? ആരാധകരോട് ജനക്ഷേമ പ്രവർത്തനങ്ങൾക്ക് മുൻഗണന നൽകാൻ ആഹ്വാനം; സോഷ്യൽ മീഡിയയിൽ ചർച്ചകൾ സജീവം

തമിഴ് സിനിമയിലെ മുൻനിര താരവും സംവിധായകനുമായ ധനുഷ് രാഷ്ട്രീയത്തിലേക്ക് പ്രവേശിക്കാനൊരുങ്ങുന്നുവെന്ന അഭ്യൂഹങ്ങൾക്ക് വീണ്ടും ചൂടുപിടിപ്പിച്ച് അദ്ദേഹത്തിന്റെ പുതിയ പ്രസംഗം. ആരാധകർ സംഘടിപ്പിച്ച രക്തദാന ക്യാംപിൽ പങ്കെടുത്ത് നടത്തിയ പ്രസംഗത്തിലാണ് സാമൂഹിക സേവനത്തിനും ജനക്ഷേമ പ്രവർത്തനങ്ങൾക്കും കൂടുതൽ പ്രാധാന്യം നൽകണമെന്ന് ധനുഷ് ആരാധകരോട് അഭ്യർത്ഥിച്ചത്. ഇതോടെയാണ് നടന്റെ രാഷ്ട്രീയ പ്രവേശനത്തെക്കുറിച്ചുള്ള ചർച്ചകൾ സമൂഹമാധ്യമങ്ങളിൽ സജീവമായത്.

തിയേറ്ററുകളിലെ ആഘോഷങ്ങളിലും സിനിമാ റിലീസുകളിലുമാത്രം ഒതുങ്ങാതെ സ്വന്തം പ്രദേശങ്ങളിലെ ജനങ്ങൾക്ക് ഉപകാരപ്പെടുന്ന പ്രവർത്തനങ്ങളിൽ സജീവമാകണമെന്ന് ധനുഷ് ആരാധകരോട് ആവശ്യപ്പെട്ടു. തങ്ങളുടെ ചുറ്റുപാടുകളിലെ കുടുംബങ്ങളുടെ ആവശ്യങ്ങൾ മനസ്സിലാക്കി, കഴിയുന്നത്ര സഹായം നൽകണമെന്നും അദ്ദേഹം പറഞ്ഞു.

“ഇത്രയധികം ആളുകൾ ഒരുമിച്ച് നിൽക്കുന്നത് വലിയ ശക്തിയാണ്. ആ ശക്തിക്ക് ഒരു നല്ല ലക്ഷ്യം നൽകണം. ഓഡിയോ ലോഞ്ചുകളിലും ആരാധക സംഗമങ്ങളിലുമാത്രം ഒതുങ്ങാതെ ജനക്ഷേമ പ്രവർത്തനങ്ങളിൽ പങ്കാളികളാകണം. നിങ്ങളുടെ പ്രദേശത്തെ ആളുകളുടെ ആവശ്യങ്ങൾ മനസ്സിലാക്കി കഴിയുന്നത്ര സഹായിക്കുക. നിങ്ങളെ ഓർത്ത് എനിക്ക് കൂടുതൽ അഭിമാനം തോന്നുന്ന രീതിയിൽ പ്രവർത്തിക്കുമെന്ന് ഞാൻ വിശ്വസിക്കുന്നു,” എന്നാണ് ധനുഷ് ആരാധകരോട് പറഞ്ഞത്.

ഈ പ്രസംഗം പുറത്തുവന്നതോടെ, നടൻ രാഷ്ട്രീയത്തിലേക്കുള്ള ആദ്യ ചുവടുവെയ്പ്പാണോ ഇതെന്ന ചർച്ചയാണ് സോഷ്യൽ മീഡിയയിൽ ശക്തമായിരിക്കുന്നത്. വിജയ് തന്റെ ആരാധക സംഘടനയായ വിജയ് മക്കൾ ഇയക്കം വഴി വർഷങ്ങളായി സാമൂഹിക സേവന പ്രവർത്തനങ്ങൾ നടത്തി പിന്നീട് രാഷ്ട്രീയ പാർട്ടി പ്രഖ്യാപിച്ചതിന്റെ പശ്ചാത്തലവും നിരവധി പേർ ചൂണ്ടിക്കാട്ടുന്നുണ്ട്. ധനുഷിനെയും രാഷ്ട്രീയത്തിലേക്ക് സ്വാഗതം ചെയ്തുകൊണ്ടുള്ള നിരവധി പോസ്റ്റുകളാണ് സമൂഹമാധ്യമങ്ങളിൽ വൈറലാകുന്നത്.

അതേസമയം, ‘രായൻ’ ചിത്രത്തിന് മികച്ച തമിഴ് ചിത്രത്തിനുള്ള ദേശീയ പുരസ്കാരം ലഭിച്ചതിനെ ചൊല്ലിയ വിവാദങ്ങൾക്കും ധനുഷ് മറുപടി നൽകി. ‘പുതുപ്പേട്ടൈ’, ‘വട ചെന്നൈ’, ‘കർണൻ’, ‘മരിയാൻ’, ‘രാഞ്ചന’ തുടങ്ങിയ തന്റെ ശ്രദ്ധേയ ചിത്രങ്ങൾക്ക് ദേശീയ പുരസ്കാരം ലഭിക്കാതിരുന്നപ്പോൾ ആരും ചർച്ച നടത്തിയില്ലെന്ന് അദ്ദേഹം പറഞ്ഞു.

ഒരു തമിഴൻ എന്ന നിലയിൽ ഇത്തവണ ലഭിച്ച രണ്ട് ദേശീയ പുരസ്കാരങ്ങൾ വിമർശനങ്ങൾക്ക് പകരം ആഘോഷിക്കണമെന്നും ആരാധകരോടും സിനിമാപ്രേമികളോടും ധനുഷ് അഭ്യർത്ഥിച്ചു.

ധനുഷിന്റെ പ്രസംഗം രാഷ്ട്രീയ പ്രഖ്യാപനമാണോ, അതോ ആരാധക സംഘടനയെ കൂടുതൽ സാമൂഹിക ഉത്തരവാദിത്തത്തിലേക്ക് നയിക്കാനുള്ള ശ്രമം മാത്രമാണോ എന്നത് വ്യക്തമല്ല. എന്നാൽ അദ്ദേഹത്തിന്റെ വാക്കുകൾ സിനിമാ ലോകത്തും സോഷ്യൽ മീഡിയയിലും വലിയ ചർച്ചകൾക്ക് വഴിവെച്ചിരിക്കുകയാണ്.