കാനഡയിലെ ഇന്ത്യ വിരുദ്ധ പ്രവർത്തനങ്ങൾക്ക് പിന്നിൽ പണമൊഴുക്കുന്നത് ഐഎസ്‌ഐ!ഐഎസ്‌ഐ ഏജന്റുമാർ ഖലിസ്ഥാനി ഗ്രൂപ്പുകളുമായി കാനഡയിൽ രഹസ്യകൂടിക്കാഴ്ച നടത്തിയെന്ന് റിപ്പോർട്ട്

ദില്ലി : ഖലിസ്ഥാൻ വിഷയത്തിൽ ഇന്ത്യ-കാനഡ നയതന്ത്ര ബന്ധം ഉലയുന്നതിനിടെ, പാക് ചാരസംഘടനയായ ഐഎസ്‌ഐയുടെ ഏജന്റുമാരും ഖലിസ്ഥാൻ ഭീകരസംഘടനകളുടെ തലവന്മാരും കാനഡയിലെ വാൻകൂവറിൽ വച്ച് അടുത്തിടെ രഹസ്യ കൂടിക്കാഴ്ച നടത്തിയെന്ന റിപ്പോർട്ട് പുറത്തു വന്നു .
അഞ്ചു ദിവസം മുൻപു നടന്ന ഈ കൂടിക്കാഴ്ചയിൽ സിഖ്‌സ് ഫോർ ജസ്റ്റിസ് (എസ്‌എഫ്‌ജെ) തലവൻ ഗുർപത്വന്ത് സിങ് പന്നൂനും മറ്റു ഖലിസ്ഥാൻ സംഘടനാ മേധാവികളും പങ്കെടുത്തുവെന്നാണ് ലഭിക്കുന്ന വിവരം. കൂടിക്കാഴ്ചയിൽ ഇന്ത്യാവിരുദ്ധ പ്രചാരണം പരമാവധി പ്രചരിപ്പിക്കാൻ ഇവർ പദ്ധതിയിട്ടെന്നാണ് ലഭിക്കുന്ന വിവരം. രഹസ്യാന്വേഷണ വൃത്തങ്ങളെ ഉദ്ധരിച്ച് ദേശീയ മാദ്ധ്യമങ്ങളാണ് ഇക്കാര്യം റിപ്പോർട്ട് ചെയ്തത്.

‘പ്ലാൻ-കെ’ എന്ന് പേരിട്ടിരിക്കുന്ന പദ്ധതിയുടെ ഭാഗമായി, കഴിഞ്ഞ കുറച്ച് മാസങ്ങളായി കാനഡയിൽ അരങ്ങേറുന്ന ഖലിസ്ഥാൻ പ്രവർത്തനങ്ങൾക്ക് ഐഎസ്‌ഐ വൻതോതിൽ ധനസഹായം നൽകുന്നുണ്ടെന്നാണ് ലഭിക്കുന്ന വിവരം.കാനഡയിലുടനീളം ഇന്ത്യ വിരുദ്ധ പ്രതിഷേധങ്ങൾ സംഘടിപ്പിക്കാനും ഇന്ത്യാ വിരുദ്ധ പ്രചാരണത്തിനായി പോസ്റ്ററുകളും ബാനറുകളും നിർമിക്കാനും ഈ ഫണ്ടാണ് ഉപയോഗിക്കുന്നത് എന്നാണ് രഹസ്യാന്വേഷണ ഉദ്യോഗസ്ഥർ നൽകുന്ന റിപ്പോർട്ട്.
ജൂണിൽ ഖലിസ്ഥാന്‍ ടൈഗര്‍ ഫോഴ്‌സിന്റെ (കെടിഎഫ്) കാനഡയിലെ തലവന്‍ ഹര്‍ദീപ് സിങ് നിജ്ജാര്‍ കൊല്ലപ്പെട്ടതിനു പിന്നിൽ ഇന്ത്യൻ രഹസ്യാന്വേഷണ ഉദ്യോഗസ്ഥർക്ക് പങ്കുണ്ടെന്ന കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ ആരോപണത്തിന് പിന്നാലെയാണ് ഇന്ത്യ -കാനഡ നയതന്ത്ര ബന്ധം വഷളായത്.