വീണ്ടും എസ്എഫ്ഐ അതിക്രമം !ചെമ്പഴന്തി എസ്എൻ കോളേജിൽ എസ്എഫ്ഐ പ്രവർത്തകർ അദ്ധ്യാപകനെ മർദ്ദിച്ചതായി ആരോപണം ! അദ്ധ്യാപകന്റെ പരാതിയിൽ പോലീസ് കേസെടുത്തു

ചെമ്പഴന്തി എസ്എൻ കോളേജിൽ എസ്എഫ്ഐ പ്രവർത്തകർ അദ്ധ്യാപകനെ മർദ്ദിച്ചതായി പരാതി.
ക്യാമ്പസിനുള്ളിൽ ഒരു ബൈക്കിൽ നാല് പേർ യാത്ര ചെയ്തത് ചോദ്യം ചെയ്ത അദ്ധ്യാപകനായ ഡോ. ബിജുവിനെ എസ്എഫ്ഐ പ്രവർത്തകരായ വിദ്യാർത്ഥികൾ കയ്യേറ്റം ചെയ്തെന്നാണ് ആരോപണം . അദ്ധ്യാപകന്‍റെ പരാതിയിൽ കഴക്കൂട്ടം പോലീസ് കേസെടുത്തു.

ഇന്നലെ വൈകുന്നേരമാണ് സംഭവം. അദ്ധ്യാപകൻ കാറിൽ പുറത്തേക്ക് പോകവേയാണ് നാല് വിദ്യാർത്ഥികൾ ഒരു ബൈക്കിൽ ക്യാമ്പസിനുള്ളിലേക്ക് കയറുന്നത് കണ്ടത്. ഇങ്ങനെ ബൈക്ക് ഓടിക്കരുതെന്നും അപകടമുണ്ടാകുമെന്നും അദ്ധ്യാപകൻ പറഞ്ഞതോടെ പ്രകോപിതരായ വിദ്യാർത്ഥികൾ കാറിന്‍റെ ഡോർ തുറന്ന് തന്നെ പിടിച്ചിറക്കി കയ്യേറ്റം ചെയ്തെന്നാണ് അദ്ധ്യാപകന്റെ ആരോപണം.ഒരു അദ്ധ്യാപകനും ഉണ്ടാകാൻ പാടില്ലാത്ത അനുഭവമാണ് നേരിട്ടതെന്നും ആ മാനസിക ആഘാതത്തിൽ നിന്നും ഇപ്പോഴും പുറത്തു വന്നിട്ടില്ലെന്നും ഡോ. ബൈജു മാദ്ധ്യമങ്ങളോട് പ്രതികരിച്ചു.

“നാല് പേരുമായി ഒരു ബൈക്കിൽ ക്യാമ്പസിൽ കയറിയതാണ് ചോദ്യംചെയ്തത്. രണ്ട് പേരോട് ഇറങ്ങാൻ പറഞ്ഞത് അവർക്ക് ഇഷ്ടപ്പെട്ടില്ല. ഇതിനു ശേഷം വിദ്യാർത്ഥികൾ മോശമായി സംസാരിക്കുകയും കയ്യേറ്റം ചെയ്യുകയും ചെയ്തു. നിയമ നടപടിയുമായി മുന്നോട്ടു പോകാനാണ് തീരുമാനം.”- ഡോ. ബിജു പറഞ്ഞു.