തനിക്കെതിരായ നീക്കങ്ങൾക്ക് പിന്നിൽ മാഫിയകളും ദേശവിരുദ്ധ ശക്തികളും; അടിപതറാതെ എം ആർ അജിത് കുമാർ; ചോദ്യം ചെയ്യലിന്റെ വിശദ വിവരങ്ങൾ പുറത്ത് ? ചർച്ചയാകാതെ ആർ എസ്സ് എസ്സ് ബന്ധം

തിരുവനന്തപുരം: കേരള പൊലീസിലെ ഒന്നാമൻ രണ്ടാമനെ ചോദ്യം ചെയ്യുന്ന അപൂവ്വ നിമിഷങ്ങൾക്കാണ് ഇന്നലെ തലസ്ഥാനം വേദിയായത്. പി വി അൻവർ ഉയർത്തിയ ആരോപണങ്ങൾ അന്വേഷിക്കുന്നതിന്റെ ഭാഗമായിട്ടാണ് ഡി ജി പി, എ ഡി ജി പി എം ആർ അജിത് കുമാറിൽ നിന്ന് മൊഴിയെടുത്തത്. ചോദ്യങ്ങൾക്ക് അജിത് കുമാർ അടിപതറാതെ മറുപടി പറഞ്ഞു എന്നാണ് സൂചന. നാല് മണിക്കൂർ നീണ്ട ചോദ്യം ചെയ്യലിൽ എ ഡി ജി പി ചില കാര്യങ്ങൾ അങ്ങോട്ട് ആവശ്യപ്പെട്ടതായാണ് സൂചന.

തനിക്കെതിരെ പി വി അൻവർ ഉന്നയിക്കുന്ന ആരോപണങ്ങളിൽ വസ്തുതയില്ല. തന്നെ തകർക്കാൻ മാഫിയാ സംഘങ്ങൾ ശ്രമിക്കുകയാണ്. അൻവറിന് മാഫിയ സംഘങ്ങളുമായും ദേശവിരുദ്ധ ശക്തികളുമായും ബന്ധമുണ്ട്. കുഴൽപ്പണക്കാരും സ്വർണ്ണകള്ളക്കടത്ത്കാരുമാണ് തനിക്കെതിരായ നീക്കങ്ങൾക്ക് പിന്നിൽ. മലപ്പുറത്ത് നടന്ന സ്വർണ്ണവേട്ടയിൽ പ്രതികാരം തീർക്കുകയാണ് മാഫിയ സംഘമെന്ന് എ ഡി ജി പി ചോദ്യം ചെയ്യലിൽ അറിയിച്ചതായാണ് റിപ്പോർട്ട്. തന്റെ സ്വത്തുമായി ബന്ധപ്പെട്ട എല്ലാ രേഖകളും സമർപ്പിക്കാൻ തയ്യാറാണെന്നും അദ്ദേഹം അറിയിച്ചിട്ടുണ്ട്

സിബിഐ മാതൃകയിൽ തനിക്ക് ചോദ്യാവലി തയ്യാറാക്കി നൽകാമെന്നും. മറുപടി എഴുതി നൽകാൻ തനിക്ക് അവസരം നൽകണമെന്നുമാണ് അജിത് കുമാർ ചോദ്യം ചെയ്യലിൽ ആവശ്യപ്പെട്ടത്. ഇതനുസരിച്ച് ചോദ്യാവലി തയ്യാറാക്കി നൽകി എ ഡി ജി പി യിൽ നിന്ന് വിശദമായ മറുപടിയും അനുബന്ധ രേഖകളും വാങ്ങാനാണ് ഡി ജി പി തയ്യാറെടുക്കുന്നത് അതിനുശേഷമായിരിക്കും ഡി ജി പി മുഖ്യമന്ത്രിക്ക് റിപ്പോർട്ട് നൽകുക. എന്നാൽ ഇപ്പോൾ കേരളത്തിൽ വലിയ രാഷ്ട്രീയ ചർച്ചാ വിഷയമായ അജിത് കുമാർ-ഹൊസബാളെ കൂടിക്കാഴ്ചയുമായി ബന്ധപ്പെട്ട ചോദ്യങ്ങൾ ഇന്നലെ ഉണ്ടായില്ല.