“‘ശിവശക്തി’ എന്ന പേര് നൽകിയത് മതേതരമല്ലെന്ന് കരുതുന്നത് കാഴ്ചപ്പാടിന്റെ പ്രശ്നം മാത്രം !” പ്രഥമ വിക്രം സാരാഭായ് വിജ്ഞാൻ പുരസ്‌കാരം ഏറ്റുവാങ്ങിക്കൊണ്ട് ഐഎസ്ആർഒ ചെയർമാൻ എസ്. സോമനാഥ്

കാക്കനാട് : ചന്ദ്രന്റെ ദക്ഷിണ ധ്രുവത്തിൽ ചന്ദ്രയാൻ -3 പേടകമിറങ്ങിയ സ്ഥലത്തിന് ‘ശിവശക്തി’ എന്ന പേര് നൽകിയത് മതേതരമല്ലെന്ന് കരുതുന്നത് കാഴ്ചപ്പാടിന്റെ പ്രശ്നം മാത്രമെന്ന് ഐഎസ്ആർഒ ചെയർമാൻ എസ്. സോമനാഥ് . വിക്രം സാരാഭായ് സയൻസ് ഫൗണ്ടേഷൻ ഏർപ്പെടുത്തിയ പ്രഥമ ’വിക്രം സാരാഭായ് വിജ്ഞാൻ പുരസ്‌കാരം മുൻ ചീഫ് സെക്രട്ടറി വി.പി. ജോയിയിൽ നിന്ന് ഏറ്റുവാങ്ങിയ ശേഷം വിദ്യാർത്ഥികളുമായി സംവദിക്കുന്നതിനിടെ ഉയർന്ന ചോദ്യത്തിന് മറുപടി പറയുകയായിരുന്നു അദ്ദേഹം.

ചാന്ദ്രദൗത്യത്തെക്കുറിച്ചും ഇന്ത്യൻ ബഹിരാകാശ പദ്ധതികളെക്കുറിച്ചുമെല്ലാം അദ്ദേഹം വിവിധ സ്‌കൂളുകളിലെ വിദ്യാർഥികൾക്ക് വിശദീകരിച്ചുനൽകി. കാക്കനാട് വിക്രം സാരാഭായ് സയൻസ് സ്‌കൂളിൽ വിക്രം സാരാഭായി സയൻസ് ഫൗണ്ടേഷൻ സംഘടിപ്പിച്ച ശാസ്ത്ര കോൺക്ലേവായിരുന്നു വേദി. ബഹിരാകാശ അവശിഷ്ടങ്ങളുടെ പ്രശ്നങ്ങൾ, ഗഗൻയാൻ, വ്യോം മിത്ര, ഭൂമിക്ക് പുറത്തുള്ള ജീവന്റെ സാന്നിദ്ധ്യം തുടങ്ങിയവയെല്ലാം ലളിതമായ ആശയങ്ങളായി വിദ്യാർത്ഥികളുമായി സംവദിച്ചു.

ഗവേഷണതലത്തിലും സംഘാടക തലത്തിലും നേതൃതലത്തിലും നടത്തിയ സമഗ്ര സംഭാവനകൾ പരിഗണിച്ചാണ് എസ്. സോമനാഥിന് പുരസ്‌കാരം നൽകിയത്. രണ്ട് ലക്ഷം രൂപയും കീർത്തിപത്രവും അടങ്ങുന്നതാണ് പുരസ്‌കാരം. ചടങ്ങിൽ ഓൺലൈനായി മുൻ ഐഎസ്ആർഒ ചെയർമാൻ ഡോ. ജി. മാധവൻ നായർ അദ്ധ്യ ക്ഷത വഹിച്ചു. വിക്രം സാരാഭായ് സയൻസ് ഫൗണ്ടേഷൻ സി.ഇ.ഒ. ഡോ. ഇന്ദിരാ രാജൻ, ജില്ലാ കളക്ടർ എൻ.എസ്.കെ. ഉമേഷ്, അസോസിയേറ്റ് ഡയറക്ടർ സുചിത്ര ഷൈജിന്ത്, തൃക്കാക്കര നഗരസഭാ ചെയർപേഴ്സൺ രാധാമണി പിള്ള, മുൻ ബി.പി.സി.എൽ. ചെയർമാൻ നന്ദകുമാർ, നഗരസഭാ സ്റ്റാൻഡിങ് കമ്മിറ്റി ചെയർപേഴ്സൺ സ്മിത സണ്ണി തുടങ്ങിയവർ ചടങ്ങിൽ സന്നിഹിതരായിരുന്നു.