പോസ്റ്റ് മുറിക്കാനാണ് റെയിൽവേ ട്രാക്കിൽ കൊണ്ടിട്ടതെന്ന് മൊഴി ! റെയിൽപ്പാളത്തിന് കുറുകെ ടെലിഫോൺ പോസ്റ്റ് കൊണ്ടിട്ട സംഭവത്തിൽ പ്രതികളുടെ ചോദ്യം ചെയ്യൽ തുടരുന്നു

കൊല്ലം: റെയിൽപ്പാളത്തിന് കുറുകെ ടെലിഫോൺ പോസ്റ്റ് കൊണ്ടിട്ട സംഭവത്തിൽ കസ്റ്റഡിയിലെടുത്ത പ്രതികളുടെ ചോദ്യം ചെയ്യൽ തുടരുന്നു. തങ്ങൾ മോഷ്ടിച്ച കാസ്റ്റ് അയൺ പോസ്റ്റ് മുറിക്കാനാണ് റെയിൽവേ ട്രാക്കിൽ കൊണ്ടിട്ടതെന്നാണ് പ്രതികൾ മൊഴി നൽകിയിരിക്കുന്നത്. പോസ്റ്റ് റെയിൽവേ ട്രാക്കിന് കുറുകെയിട്ടാൽ പുലർച്ചെ അതുവഴി പോകുന്ന പാലരുവി എക്സ്പ്രസ് ഇതിന് മുകളിലൂടെ കടന്നുപോവുകയും പോസ്റ്റ് കഷണങ്ങളാകുമെന്നുമാണ് കരുതിയിരുന്നതെന്നും ഇവർ നൽകിയ മൊഴിയിലുണ്ടെന്നാണ് വിവരം.

അതേസമയം ഇരുവരും നിരവധി ക്രമിനൽ കേസുകളിൽ പ്രതികളാണെന്ന് കൊല്ലം റൂറൽ എസ്.പി. കെ.വി.സാബു പറഞ്ഞു. ഇവർ ലഹരി ഉപയോ​ഗിക്കുന്നവരാണെന്നും റൂറൽ എസ്.പി പറഞ്ഞു.

“മദ്യപാനികളായ ഇവർ കഴിഞ്ഞദിവസവും മദ്യപിച്ചിരുന്നു. ട്രെയിൻ അട്ടിമറി സാധ്യതയേക്കുറിച്ച് ഇപ്പോൾ പറയാൻ പറ്റില്ലെന്നും അദ്ദേഹം പറഞ്ഞു. കസ്റ്റഡിയിലുള്ള ഒരാള്‍ക്കെതിരേ
പതിനൊന്നും രണ്ടാമനെതിരേ അ‍ഞ്ചും കേസുകളാണുള്ളത്. ഇതിൽ അരുണിന്റെ പേരിലുള്ള കേസുകളിൽ ഒരെണ്ണം കുണ്ടറയിലെ എസ്.ഐ. ആയിരുന്ന അംബരീഷിനെ ആക്രമിച്ചതാണ്.” -റൂറൽ എസ്.പി പറഞ്ഞു.

സൈബർ സെല്ലിന്റെയും കുണ്ടറ പോലീസിന്റെയും അന്വേഷണമാണ് രാജേഷിനേയും അരുണിനേയും കുടുക്കിയത്. രണ്ടുദിവസം മുൻപ് രണ്ടുപ്രതികളും ഇപ്പോഴത്തെ സംഭവം നടന്ന സ്ഥലത്തിന് സമീപം സ്കൂട്ടറിൽ സ‍ഞ്ചരിച്ചിരുന്നു. ഈ സമയം രാത്രി പട്രോളിങ് നടത്തുകയായിരുന്ന കുണ്ടറ പോലീസ് സംഘം ഇവരെ കാണുകയും നിരവധി കേസുകളിലെ പ്രതികളാണിവർ എന്ന് മനസിലാക്കിയതിന്റെ അടിസ്ഥാനത്തിൽ ഇരുവരേയും സ്ഥലത്തുനിന്ന് പറഞ്ഞുവിടുകയും ചെയ്തിരുന്നു. ഈ സ്കൂട്ടറാണ് സിസിടിവി. പരിശോധിച്ചപ്പോൾ നിർണായകമായത്. മൊബൈൽ നമ്പർ കേന്ദ്രീകരിച്ച് പരിശോധന നടത്തിയപ്പോൾ സംഭവ സമയത്ത് പ്രതികള്‍ റെയില്‍ പാളത്തിന് സമീപമുള്ള ടവര്‍ ലൊക്കേഷനില്‍ ഉണ്ടായിരുന്നുവെന്നും പോലീസ് കണ്ടെത്തി.