തളിപ്പറമ്പിൽ നടന്ന ജൂവലറി മോഷണം;പോലീസിന്റെ ഭാഗത്ത് വൻ വീഴ്ച്ച;യഥാർത്ഥ പ്രതികളായ ആന്ധ്ര സ്വദേശികൾക്ക് പകരം അറസ്റ്റ് ചെയ്തത് തമിഴ്‌നാട് സ്വദേശികളെ;നിരപരാധിത്വം കോടതിയിൽ തെളിയിച്ച് ജയിൽമോചിതരായി യുവതികൾ

തളിപ്പറമ്പ്:ജൂവലറി മോഷണ കേസിൽ പോലീസിന്റെ ഭാഗത്ത് വൻ വീഴ്ച്ച. യഥാർത്ഥ പ്രതികളായ
ആന്ധ്ര സ്വദേശികൾക്ക് പകരം അറസ്റ്റ് ചെയ്തത് തമിഴ്‌നാട് സ്വദേശികളെയായിരുന്നു.കോഴിക്കോട് ജില്ലയിൽ വച്ച് യഥാർത്ഥ പ്രതികൾ ഇവർ ആണ് എന്ന് പറഞ്ഞാണ് പോലീസ് ആളുമാറി ഇവരെ പിടികൂടിയത്. തളിപ്പറമ്പിലെ ഒരു ജൂവലറിയിൽ നിന്നും സ്വർണ്ണം മോഷ്ടിച്ച കേസിലാണ് യുവതികളെ അറസ്റ്റ് ചെയ്തത്.

ആന്ധ്ര സ്വദേശികളായ ആനന്ദി, കനിമൊഴി എന്നിവരെയാണ് യഥാർത്ഥത്തിൽ അറസ്റ്റ് ചെയ്യേണ്ടിയിരുന്നത്. എന്നാൽ പോലീസ് ആളുമാറി സുധയെയും സംഗീതയെയും അറസ്റ്റ് ചെയ്യുകയായിരുന്നു. എന്നാൽ തങ്ങളുടെ നിരപരാധിത്വം കോടതിയിൽ തെളിയിച്ച് ഇരുവരും കഴിഞ്ഞ ദിവസം ഉച്ചയോടെ ജയിൽമോചിതരായി. പോലീസിന്റെയും ജയിൽ വകുപ്പിന്റെയും ഭാഗത്തുനിന്നുണ്ടായ ഗുരുതര വീഴ്ചയിലാണ് ഇരുവരും അറസ്റ്റ് ചെയ്യപ്പെട്ടത്. കണ്ണൂർ ജില്ലയിലെ വക്കീൽ മിഥുൻ മുഖേനയാണ് ഇരുവരും കോടതിയിൽ സമീപിച്ചത്.

കോടതിയിൽ ഇരുവരുടെയും ആധാർ കാർഡ് ഉൾപ്പെടെയുള്ള തെളിവുകൾ നിരത്തിയാണ് അഭിഭാഷകൻ വാദിച്ചത്. ആദ്യഘട്ടത്തിൽ ഇരുവരെയും ജാമ്യം നൽകി കോടതിയിൽ നിന്നും പുറത്തിറക്കാൻ ഉത്തരവിട്ടു. എന്നാൽ ജാമ്യാപേക്ഷയുമായി ചെന്ന അഭിഭാഷകന് മുന്നിൽ സുധ, സംഗീത എന്നീ പേരുകളിൽ രണ്ടുപേർ ഇവിടെ തടവിലില്ലെന്നായിരുന്നു കണ്ണൂർ വനിത ജയിലിൽ നിന്നുള്ള മറുപടി. തുടർന്ന് അഭിഭാഷകൻ മുഖേന വീണ്ടും ഹൈക്കോടതിയെ സമീപിക്കുകയായിരുന്നു. കഴിഞ്ഞ ദിവസം ജയിൽമോചിതരായ ഇരുവരും സ്വന്തം നാടായ തമിഴ്‌നാട്ടിലേക്ക് മടങ്ങി.