സമരം ചെയ്യുന്ന പാർട്ടികളുടെ മുഖപത്രങ്ങളിലും ചാനലുകളിലും തൊഴിലാളികൾക്ക് അവകാശങ്ങൾ ഉറപ്പാക്കിയോ? വേജ് ബോർഡ് ശുപാർശ നടപ്പിലാക്കിയോ? മുതിർന്ന മാധ്യമപ്രവർത്തകൻ എസ് ഡി വേണുവിന്റെ ഫേസ്ബുക്ക് പോസ്റ്റ് ശ്രദ്ധേയമാകുന്നു

തിരുവനന്തപുരം: ഇടത് ട്രേഡ് യൂണിയനുകൾ ആഹ്വാനം ചെയ്ത പണിമുടക്കിനെതിരെ കേരളത്തിൽ ജനരോക്ഷം പുകയുകയാണ്. പൊതുഗതാഗതം തടസ്സപ്പെടുത്തിയും വാണിജ്യ വ്യാപാര സ്ഥാപനങ്ങൾ അടപ്പിച്ചും ജോലിക്കെത്തുന്നവരെ തടഞ്ഞു തിരിച്ചയച്ചും ജനജീവിതം സ്തംഭിപ്പിക്കുന്ന സംഘടനകൾക്കും കൂട്ടുനിൽക്കുന്ന സർക്കാരിനുമെതിരെ കോടതി നിരീക്ഷണങ്ങളുമുണ്ടായി. ഇടത് സംഘടനകളുടെ കപട തൊഴിലാളി സ്നേഹം തുറന്നു കാട്ടി മുതിർന്ന മാധ്യമ പ്രവർത്തകൻ എസ് ഡി വേണു കുമാറിന്റെ ഫേസ്ബുക് പോസ്റ്റ് ശ്രദ്ധേയമാകുന്നു. പല മേഖലകളിലെയും തൊഴിലാളികളുടെ ആവശ്യങ്ങളെ സംഘടനകൾ അവഗണിക്കുകയാണ്. സംസ്ഥാനത്തെ മാധ്യമ പ്രവർത്തകരുടെ തൊഴിൽ സമയവും വേതനവുമെല്ലാം തന്റെ ഫേസ്ബുക്ക് പോസ്റ്റിലൂടെ വേണു ചൂണ്ടിക്കാട്ടുന്നു. സമരം ചെയ്യുന്ന സംഘടനകളുടെ നിയന്ത്രണത്തിലുള്ള മാധ്യമ സ്ഥാപനങ്ങളിൽ പോലും തൊഴിലാളികളുടെ അവകാശങ്ങൾ സംരക്ഷിക്കപ്പെടുന്നില്ല. അദ്ദേഹത്തിന്റെ ഫേസ്ബുക്ക് പോസ്റ്റിന്റെ പൂർണ്ണരൂപം;

“കേരളത്തിൽ മാത്രം ബന്ദായി മാറിയ ദേശീയ പണിമുടക്കിനെ അരയും തലയും മുറുക്കി ന്യായീകരിച്ച് വിയർക്കുകയാണ് തൊഴിലാളി സംരക്ഷകർ എന്ന് അവകാശപ്പെടുന്ന ഒരു വിഭാഗം നേതാക്കൾ. വണ്ടിയുമായി വഴിയിലിറങ്ങിയ ഓട്ടോക്കാരനെ ഇടിച്ച് ചമ്മന്തിയാക്കിയ സംഭവത്തെ സി.ഐ.ടി.യു. നേതാവ് എളമരം കരീം എത്ര ലാഘവത്തോടെയാണ് കണ്ടത്. ഓട്ടോക്കാരനെ പിച്ചിയതും നുള്ളിയതും മാധ്യമക്കാർ വലിയ വാർത്തയാക്കിയത്രേ. അതേ സമയം സമരത്തിന് വേണ്ടത്ര പ്രചാരം കൊടുത്തില്ല പോലും.

അല്ല സഖാവേ, മാധ്യമക്കാരോടാണല്ലോ രോഷം പ്രകടിപ്പിച്ചത് ! വിദേശകുത്തകകളെ ആകർഷിക്കാൻ ഇന്ത്യയിൽ ജോലി സമയം കൂട്ടുന്നതടക്കമുള്ള വിഷയമാണല്ലോ സമരത്തിനാധാരം.

നിങ്ങൾ ആക്ഷേപിച്ച മാധ്യമ പ്രവർത്തകർ ഇവിടെ എത്ര മണിക്കൂറാണ് ജോലി ചെയ്യുന്നതെന്ന് ഒന്ന് അന്വേഷിച്ച് നോക്കണം. പന്ത്രണ്ട് മണിക്കൂർ ജോലിയൊക്കെ ബ്യൂറോകളിൽ സർവ്വസാധാരണം. രാത്രിയെന്നോ പകലെന്നോ മഴയെന്നോ വെയിലെന്നോ നിപ്പയെന്നോ കൊറോണയെന്നോ വ്യത്യാസമില്ലാതെ പണിയെടുക്കുന്നവരാണെല്ലാവരും. വാച്ച് നോക്കാതെ പണിയെടുക്കുന്ന ഈ വിഭാഗത്തിന് കിട്ടുന്ന ശമ്പളം എത്രയുണ്ടെന്ന് നിങ്ങൾക്ക് നന്നായറിയാം. പതിനായിരം രൂപ തികച്ച് കിട്ടാത്തവർ അക്കൂട്ടത്തിൽ നിരവധി പേരുണ്ടെന്നും നിങ്ങൾക്ക് അറിയാം. ഇവരുടെ പ്രശ്നങ്ങളിൽ നിങ്ങൾ ആർക്കൊപ്പം ? മുതലാളിമാർക്കൊപ്പമോ തൊഴിലാളികൾക്കൊപ്പമോ? മാസങ്ങളായി ശമ്പളം ലഭിക്കാത്ത എത്ര മാധ്യമ പ്രവർത്തകർ ഈ കേരളത്തിലുണ്ടെന്ന് നിങ്ങൾക്കറിയാത്തതല്ല. പക്ഷേ അവർക്കു വേണ്ടി നിങ്ങൾ ഇത് വരെ എന്തു ചെയ്തു?

ഇന്നലെ ഏഷ്യാനെറ്റിൽ ഐ.എൻ.ടി.യു.സി.യുടെ ആർ.ചന്ദ്രശേഖരനും സി.പി.ഐ. പ്രതിനിധിയും മുൻ മന്ത്രിയുമായ കെ.പി. രാജേന്ദ്രനും ദേശീയ പണിമുടക്കി നെ ന്യായീകരിച്ച് സംസാരിക്കുന്നതിനിടെ അവതാരകനെ തൊഴിലാളിവിരുദ്ധനാക്കാൻ ശ്രമിക്കുന്നതും കണ്ടു. അതൊക്കെ നിങ്ങളുടെ രാഷ്ട്രീയം. ആയിക്കോട്ടെ.

നിങ്ങൾ ഇങ്ങനെയൊക്കെ പറയുമ്പോൾ നിങ്ങളുടെ പാർട്ടിയുടെ മുഖ പത്രങ്ങളിലെങ്കിലും കാര്യങ്ങൾ വെടിപ്പായിരിക്കണ്ടേ ? അല്ല , ചന്ദ്രശേഖരൻ സാറേ! നമ്മുടെ വീക്ഷണത്തിൽ വേജ് ബോർഡ് ശുപാർശ നടപ്പാക്കിയിട്ടുണ്ടോ? കുടിശികയില്ലാതെ ജയ്ഹിന്ദിലും വീക്ഷണത്തിലും അവിടുത്തെ തൊഴിലാളികൾക്ക് ശമ്പളം കിട്ടുന്നുവെന്ന് ഉറപ്പാക്കിയിട്ടുണ്ടോ?
രാജേന്ദ്രൻ സാറിനോടും ഇതേ ചോദ്യങ്ങൾ ചോദിക്കുന്നു. ജനയുഗത്തിൽ വേജ് ബോർഡ് നടപ്പാക്കിയോ ?

വലിയ വായിൽ നാട്ടുകാരോട് തൊഴിലാളി സ്നേഹം തട്ടി വിടും മുമ്പ് സ്വന്തം ‘തറവാട്ടിൽ ‘ എങ്കിലും അത് നടപ്പാക്കേണ്ടേ ? നിലവിലുള്ള നിയമമെങ്കിലും ഇവിടെ നടപ്പാക്കുന്നുവെന്ന് നിങ്ങൾ നേതാക്കന്മാർ ഒന്ന് ഉറപ്പാക്ക് . എന്നിട്ടു പോരെ കേരളത്തിലെ ദേശീയ പണിമുടക്ക് !”