വയനാട്ടിൽ കെ. സുരേന്ദ്രന്റെ പേര് നിർദേശിച്ചത് നരേന്ദ്ര മോദിയും ജെ പി നദ്ദയും !ദേശീയ നേതാക്കളും താര പ്രചാരകരും സുരേന്ദ്രനായി വയനാട്ടിലേക്ക്

വയനാട് മണ്ഡലത്തിൽ സ്ഥാനാർത്ഥിയായി സംസ്ഥാന അദ്ധ്യക്ഷൻ കെ സുരേന്ദ്രന്റെ പേര് നിർദേശിച്ചത് പ്രധാനമന്ത്രി നരേന്ദ്രമോദിയും ദേശീയ അദ്ധ്യക്ഷൻ ജെ പി നദ്ദയും. യുഡിഎഫ് സ്ഥാനാർഥിയായി രാഹുൽ ഗാന്ധിയും എൽഡിഎഫിനായി സിപിഐ നേതാവ് ആനി രാജയും മത്സരിക്കുന്ന വയനാട്ടിൽ ബിജെപിയുടെ സംസ്ഥാന അദ്ധ്യക്ഷൻ തന്നെ എത്തിയതോടെ ശക്തമായ പോരാട്ടം തന്നെ നടക്കും എന്നുറപ്പായി. രാഹുൽ ഗാന്ധിയും ആനി രാജയും വിസിറ്റിങ് വീസക്കാരും തന്റേത് സ്ഥിരം വീസയുമാണെന്ന മുനവച്ച പരാമർശവുമായാണ് സുരേന്ദ്രൻ വയനാട്ടിലേക്ക് എത്തുന്നത്. വയനാട്ടിൽ സ്ഥാനാർഥിയായി പരിഗണിക്കുന്ന കാര്യം പാർട്ടി ദേശീയ നേതൃത്വം തന്നെ സുരേന്ദ്രനെ കഴിഞ്ഞയാഴ്ച ദില്ലിയിലേക്ക് വിളിപ്പിച്ച് വിശദീകരിച്ചിരുന്നു.

ലോക്‌സഭാ തെരഞ്ഞെടുപ്പിനു ശേഷം സംസ്ഥാന അധ്യക്ഷന്റെ ചുമതല ഒഴിയുന്ന കെ സുരേന്ദ്രന് സംഘടനാ തലത്തിലോ ഭരണ സംവിധാനത്തിലോ പുതിയ ചുമതല നൽകും എന്നാണ് റിപ്പോർട്ട്. രാജ്യസഭാ എംപി സ്ഥാനവും കേന്ദ്രമന്ത്രിസഭയിൽ അംഗത്വവും ഉൾപ്പെടെ അദ്ദേഹത്തിനായി പാർട്ടിയുടെ പരിഗണനയിലുണ്ടെന്നാണ് വിവരം.ബിജെപിയുടെ ദേശീയ നേതാക്കളും താര പ്രചാരകരും ഇക്കുറി സുരേന്ദ്രനായി രംഗത്തിറങ്ങും. ഇന്നലെ പ്രധാനമന്ത്രിയുടെ വസതിയിൽ ബിജെപി ദേശീയ അധ്യക്ഷൻ ജെ.പി. നദ്ദ, കേന്ദ്ര ആഭ്യന്തര മന്ത്രി അമിത് ഷാ എന്നിവർ പങ്കെടുത്ത യോഗത്തിലാണ് സുരേന്ദ്രന്റെ സ്ഥാനാർഥിത്വവും അന്തിമമാക്കിയത്. , രാഹുൽ ഗാന്ധിക്കും ഇൻഡി മുന്നണിക്കും എതിരായ പ്രചാരണ വിഷയങ്ങൾ വയനാട് മണ്ഡലത്തിൽ നിന്ന് തന്നെ ബിജെപി ദേശീയ നേതൃത്വം ഉയർത്തിക്കൊണ്ടുവരുമെന്നുമാണ് വിലയിരുത്തപ്പെടുന്നത്.