അർജുൻ ആയങ്കിക്കെതിരെ കാപ്പ നടപടി; ജില്ലാ കളക്ടർ ശുപാർശ അംഗീകരിച്ചു

കണ്ണൂർ: മുൻ ഡി.വൈ.എഫ്.ഐ പ്രവർത്തകനും നേതാവുമായിരുന്ന അർജുൻ ആയങ്കിക്കെതിരെ കാപ്പ (കേരള സാമൂഹ്യവിരുദ്ധ പ്രവർത്തനങ്ങൾ തടയൽ നിയമം) പ്രകാരമുള്ള നടപടിക്ക് ജില്ലാ ഭരണകൂടത്തിന്റെ അനുമതി. കണ്ണൂർ സിറ്റി പോലീസ് കമ്മീഷണർ സമർപ്പിച്ച ശുപാർശ ജില്ലാ കളക്ടർ പി. വിഷ്ണുരാജ് അംഗീകരിച്ചു.

കഴിഞ്ഞ ഏഴ് വർഷത്തിനിടെ ഒൻപത് കേസുകളിൽ പ്രതിയായ അർജുൻ ആയങ്കിക്ക് സ്വർണക്കടത്ത്, ക്വട്ടേഷൻ സംഘങ്ങളുമായുള്ള ബന്ധം ഉൾപ്പെടെയുള്ള കേസുകളിൽ ക്രിമിനൽ പശ്ചാത്തലമുണ്ടെന്നാണ് പോലീസ് റിപ്പോർട്ട്. നിലവിലുള്ള കേസുകളും മുൻകാല ക്രിമിനൽ പശ്ചാത്തലവും പരിഗണിച്ചാണ് കാപ്പ നടപടി ശുപാർശ ചെയ്തതെന്നാണ് വിവരം.

2023ൽ പാലക്കാട് മീനാക്ഷിപുരത്ത് സ്വർണവ്യാപാരിയെ ആക്രമിച്ച് സ്വർണം കവർന്ന കേസിൽ പ്രധാന ആസൂത്രകനെന്ന ആരോപണത്തിലും അർജുൻ ആയങ്കി പോലീസ് കസ്റ്റഡിയിലായിരുന്നു.

2026 മെയ് മാസത്തിൽ സുഹൃത്തിന്റെ വിവാഹത്തിൽ പങ്കെടുക്കാനെത്തിയ അർജുൻ ആയങ്കിയെയും സംഘത്തെയും എറണാകുളം ജില്ലയിലെ കോതമംഗലത്തെ ഒരു റിസോർട്ടിൽ നിന്ന് പോലീസ് കസ്റ്റഡിയിലെടുത്തിരുന്നു. നിയമസഭാ തിരഞ്ഞെടുപ്പ് സമയത്ത് കോതമംഗലത്തിന് സമീപം ക്രിമിനൽ പ്രവർത്തനങ്ങൾ നടത്തുന്നതിനായി സംഘം ചേർന്നുവെന്ന സംശയത്തെ തുടർന്നായിരുന്നു നടപടി.

കോതമംഗലം സ്റ്റേഷൻ ഹൗസ് ഓഫീസറെ സോഷ്യൽ മീഡിയയിലൂടെയും വോയ്സ് മെസേജിലൂടെയും ഭീഷണിപ്പെടുത്തുകയും അധിക്ഷേപിക്കുകയും ചെയ്തുവെന്ന പോലീസ് ആരോപണത്തിന്റെ അടിസ്ഥാനത്തിൽ അർജുൻ ആയങ്കിക്കെതിരെ പുതിയ കേസും രജിസ്റ്റർ ചെയ്തിരുന്നു.

തുടർന്ന് അർജുൻ ആയങ്കി മുൻകൂർ ജാമ്യത്തിനായി ഹൈക്കോടതിയെ സമീപിച്ചെങ്കിലും ഹർജി കോടതി തള്ളി. പോലീസ് തിരച്ചിൽ തുടരുന്നതിനിടെ പോലീസിനെയും സർക്കാരിനെയും വെല്ലുവിളിക്കുന്ന തരത്തിലുള്ള പോസ്റ്റുകളും വീഡിയോകളും സോഷ്യൽ മീഡിയയിൽ പങ്കുവെച്ചതായും പോലീസ് ആരോപിക്കുന്നു.

ദിവസങ്ങളോളം നടത്തിയ തിരച്ചിലിനൊടുവിൽ ഓട്ടോ ഡ്രൈവറിൽ നിന്ന് ലഭിച്ച വിവരത്തിന്റെ അടിസ്ഥാനത്തിലാണ് കണ്ണൂരിലെ ഒരു അഭിഭാഷകയുടെ ഫ്ലാറ്റിൽ നിന്ന് അർജുൻ ആയങ്കിയെ പോലീസ് അറസ്റ്റ് ചെയ്തത്.

അർജുൻ ആയങ്കി സമൂഹത്തിന് ഭീഷണിയാണെന്നും നിലവിൽ ജുഡീഷ്യൽ കസ്റ്റഡിയിൽ കഴിയുന്ന ഇയാൾക്ക് ജാമ്യം ലഭിച്ചാൽ സമാനമായ കുറ്റകൃത്യങ്ങളിൽ വീണ്ടും ഏർപ്പെടാൻ സാധ്യതയുണ്ടെന്നും ബോധ്യപ്പെട്ട സാഹചര്യത്തിലാണ് കാപ്പ നടപടി സ്വീകരിക്കുന്നതെന്ന് ജില്ലാ ഭരണകൂടത്തിന്റെ ഉത്തരവിൽ വ്യക്തമാക്കുന്നു.

ജില്ലാ കളക്ടർ പോലീസ് കമ്മീഷണറുടെ ശുപാർശ അംഗീകരിച്ചതോടെ അർജുൻ ആയങ്കിക്കെതിരായ തുടർ നിയമനടപടികൾക്ക് വഴിയൊരുങ്ങി. കാപ്പ പ്രകാരമുള്ള കരുതൽ തടങ്കലിന്റെ ഭാഗമായി അർജുൻ ആയങ്കിയെ കണ്ണൂർ സെൻട്രൽ ജയിലിൽ അടയ്ക്കുന്നതിനുള്ള നടപടികൾ സ്വീകരിക്കാനും പോലീസ് നിർദേശിച്ചിട്ടുണ്ട്.