അതും ഊരാളുങ്കലിന് ! വയനാട് പുനരധിവാസ പദ്ധതിയുടെ നിർമ്മാണ ചുമതല ഊരാളുങ്കൽ സഹകരണ സംഘത്തിന്; മേൽനോട്ടം കിഫ്കോണിന്; അന്തിമ രൂപം നൽകി മന്ത്രിസഭാ യോഗം

തിരുവനന്തപുരം: വയനാട് പുനരധിവാസ പദ്ധതിയ്ക്ക് അന്തിമ രൂപം നൽകി മന്ത്രിസഭ. പുനരധിവാസ പദ്ധതിയുടെ നിർമ്മാണ ചുമതല ഊരാളുങ്കൽ സഹകരണ സംഘത്തിനായിരിക്കും. നിർമ്മാണ മേൽനോട്ടം കിഫ്കോണിന്. 750 കോടിരൂപയുടെ പദ്ധതിയാണ്. രണ്ട് ടൗൺഷിപ്പുകൾ ഉൾപ്പെടുന്നതാണ് പുനരധിവാസ പദ്ധതി. കൽപ്പറ്റയിലും നെടുമ്പാലയിലുമാണ് ടൗൺഷിപ്പുകൾ. 1000 സ്ക്വയർ ഫീറ്റുള്ള വീടുകളായിരിക്കും നിർമ്മിക്കുക.

കഴിഞ്ഞ ജൂലൈ 30 നാണ് രാജ്യത്തെ നടുക്കിയ മുണ്ടക്കൈ ചൂരൽമല ദുരന്തം നടന്നത്. ദുരന്തം നടന്ന് 5 മാസത്തിന് ശേഷമാണ് ഒരു സമഗ്ര പുനരധിവാസ പദ്ധതി സർക്കാർ പ്രഖ്യാപിക്കുന്നത്. നേരത്തെ സ്പോൺസർ മാരുമായി മുഖ്യമന്ത്രി ചർച്ച നടത്തിയിരുന്നു.നിരവധി സംസ്ഥാന സർക്കാരുകളും സംഘടനകളും വ്യക്തികളും ദുരന്തത്തിന് ഇരയായവർക്ക് വീടുകൾ വച്ചുനൽകാമെന്ന് വാഗ്ദാനം ചെയ്‌തിരുന്നു. അവരുമായി മുഖ്യമന്ത്രി ഇന്ന് തിരുവനന്തപുരത്ത് ചർച്ച നടത്തിയിരുന്നു.

നേരത്തെ വയനാട് ദുരന്തത്തെ കേന്ദ്രസർക്കാർ അതിതീവ്ര ദുരന്തമായി പ്രഖ്യാപിച്ചിരുന്നു. വയനാട് പുനരധിവാസത്തിന് പണം ഒരു തടസ്സമാകില്ലെന്നും സാധ്യമായത് എല്ലാം ചെയ്യുമെന്നും പ്രധാനമന്ത്രി നേരത്തെ പ്രഖ്യാപിച്ചിരുന്നു. എന്നാൽ സംസ്ഥാന സർക്കാർ പി ഡി എൻ എ റിപ്പോർട്ട് സമർപ്പിച്ചത് നവംബർ 13 ന് മാത്രമായിരുന്നു. സമഗ്രമായ പുനരധിവാസ പദ്ധതി സംസ്ഥാന മന്ത്രിസഭ അംഗീകരിച്ചത് ഇന്ന് മാത്രമാണ്.