തന്നെ അപമാനിക്കുന്നത് അമേരിക്കൻ ഹിന്ദു സംഘടനയുടെ അവാർഡ് സ്വീകരിച്ചതിന്റെ പേരിൽ; ഗാനം കമ്മിറ്റി തള്ളിയെങ്കിൽ അക്കാര്യം രേഖാമൂലം അറിയിക്കാനുള്ള ചങ്കൂറ്റം ഉണ്ടാകണം; സച്ചിദാനന്ദന് ചങ്കൂറ്റമില്ല അതുണ്ടാകണമെങ്കിൽ തന്തയ്ക്ക് പിറക്കണം; അടിക്ക് തിരിച്ചടിയുമായി ശ്രീകുമാരൻ തമ്പി

തിരുവനന്തപുരം: ബാലചന്ദ്രൻ ചുള്ളിക്കാടിന് പിന്നാലെ സാഹിത്യ അക്കാദമിക്കെതിരെ ഗുരുതര ആരോപണങ്ങളുമായി കവിയും ഗാനരചയിതാവുമായ ശ്രീകുമാരൻ തമ്പിയും. തന്നെക്കൊണ്ട് കേരളഗാനം എഴുതി വാങ്ങിയശേഷം സ്വീകരിച്ചോ നിരാകരിച്ചോ എന്നറിയിക്കാതെ ഗാനത്തിനായി മാദ്ധ്യമങ്ങളിൽ വീണ്ടും ഗാനത്തിനായി പരസ്യം നൽകിയതിനെതിരെയാണ് അദ്ദേഹം ഇന്നലെ പരസ്യമായി രംഗത്ത് വന്നത്. എന്നാൽ ഇന്ന് രാവിലെ കേരളം സാഹിത്യ അക്കാദമി അദ്ധ്യക്ഷൻ സച്ചിദാനന്ദൻ ശ്രീകുമാരൻ തമ്പിയെ കൂടുതൽ അപമാനിക്കുന്ന പ്രസ്താവനയുമായി രംഗത്തുവന്നു. കേരളഗാനത്തിൽ ശ്രീകുമാരൻ തമ്പി ഉപയോഗിച്ചിരിക്കുന്നത് വെറും ക്ളീഷേ വാക്കുകളാണെന്നും മതേതരമൂല്യങ്ങൾക്ക് ഊന്നൽ നൽകിയില്ലെന്നും അതിനാൽ കമ്മിറ്റി ഗാനം തള്ളിയെന്നും. ഹരിനാരായണന്റെ പാട്ട് തെരഞ്ഞെടുത്തുവെന്നുമാണ് സച്ചിദാനന്ദന്റെ പ്രതികരണം.

എന്നാൽ അക്കാദമി അദ്ധ്യക്ഷന്റെ ഈ പ്രതികരണം തന്നെ വേദനിപ്പിച്ചുവെന്നും അമേരിക്കൻ ഹിന്ദു സംഘടനയുടെ അവാർഡ് സ്വീകരിച്ചതിന്റെ പേരിലാണ് തന്നെ സച്ചിദാന്ദൻ അക്കാദമിയെ ഉപയോഗിച്ച് അപമാനിക്കുന്നതെന്നും ശ്രീകുമാരൻ തമ്പി പറഞ്ഞു. കേരള ഹിന്ദുസ് ഓഫ് നോർത്ത് അമേരിക്ക നൽകുന്ന ആർഷദർശനം പുരസ്‌കാരം ശ്രീകുമാരൻ തമ്പിയെ തേടിയെത്തിയിരുന്നു. കമ്മിറ്റി ഗാനം നിരാകരിച്ചെങ്കിൽ അത് തന്നെ രേഖാമൂലം അറിയിക്കാനുള്ള ചങ്കൂറ്റം കാണിക്കണമായിരുന്നു. സച്ചിദാനന്ദന് ചങ്കൂറ്റമില്ലെന്നും അതുണ്ടാകണമെങ്കിൽ തന്തയ്ക്ക് പിറക്കണമെന്നും അദ്ദേഹം തിരിച്ചടിച്ചു.

ബാലചന്ദ്രൻ ചുള്ളിക്കാടിന്റെ അനുഭവത്തിന്റെ പശ്ചാത്തലത്തിൽ തനിക്ക് നേരിട്ട അനുഭവത്തെ കുറിച്ച് ശ്രീകുമാരൻ തമ്പി ഇന്നലെയാണ് കേരളഗാനവുമായി ബന്ധപ്പെട്ട കാര്യങ്ങൾ വെളിപ്പെടുത്തിയത്. കേരളഗാനം എഴുതിത്തരാൻ ആവശ്യപ്പെട്ടപ്പോൾ ആദ്യം താൻ നിരാകരിച്ചതായും സച്ചിദാനന്ദന്റെയും അബൂബക്കറുടെയും നിർബന്ധത്തിന് പിന്നീട് വഴങ്ങുകയായിരുന്നെന്നും അദ്ദേഹം പറഞ്ഞു. ഗാനരചന ലളിതമായിരിക്കണമെന്ന് നിഷ്ക്കർഷിച്ചിരുന്നു. താൻ എഴുതി നൽകിയ ഗാനത്തിന്റെ പല്ലവി പിന്നീട് മാറ്റിയെഴുതിച്ചു. പിന്നീട് നന്ദി എന്ന സന്ദേശം മാത്രം അയക്കുകയും ദിവസങ്ങൾക്ക് ശേഷം കേരളഗാനത്തിനായി പരസ്യം നൽകുകയുമായിരുന്നു.