കൊറിയക്കാരുടെ പ്രാക്ക്; കിം ജോങ് ഉന്നിന് മാസങ്ങളായി ഉറക്കമില്ല;ഭാരം 140 കിലോ കടന്നു

സോൾ : ഉത്തര കൊറിയൻ ഏകാധിപതി കിം ജോങ് ഉന്നിനെ ഗുരുതരമായ ആരോഗ്യപ്രശ്നങ്ങൾ അലട്ടുന്നുന്നുവെന്ന് റിപ്പോർട്ട്. മാസങ്ങളായി ഉറക്കമില്ലായ്മ അലട്ടുന്ന കിം ഒടുവിൽ മദ്യത്തോടും പുകയിലയോടും അഭയം പ്രാപിച്ചതായി ദക്ഷിണ കൊറിയയിലെ ചാരസംഘത്തെ ഉദ്ധരിച്ച് ബ്ലൂംബർഗ് റിപ്പോർട്ട് ചെയ്തു.

ഉറക്കമില്ലായ്മയ്ക്കായുള്ള മരുന്നുകൾ മുതിർന്ന ഉദ്യോഗസ്ഥർക്കായി ഉത്തര കൊറിയ വിദേശത്തുനിന്നു ഇറക്കുമതി ചെയ്യുന്നുണ്ട് എന്നത് പരസ്യമായ രഹസ്യം. മൾബറോ അടക്കമുള്ള സിഗരറ്റ് ബ്രാൻഡുകളും കിമ്മിനു വേണ്ടി ധാരാളം ഇറക്കുമതി ചെയ്യുന്നുണ്ട്.

മദ്യത്തോടൊപ്പം കഴിക്കാനുള്ള മുന്തിയ ലഘുഭക്ഷണങ്ങളുടെ ഇറക്കുമതിയും ഉത്തര കൊറിയയിൽ വർധിച്ചതായാണ് വിവരം. ഇതിനിടെ ആർട്ടിഫിഷ്യൽ ഇന്റലിജൻസ് സാങ്കേതിക വിദ്യ ഉപയോഗിച്ചു സമീപകാല ചിത്രങ്ങളുടെ വിശകലനത്തിൽ, കിമ്മിന്റെ ശരീരഭാരം കൂടിയതായും കണ്ടെത്തി.

140 കിലോഗ്രാമിലേറെയാണ് ഇപ്പോൾ കിമ്മിന്റെ ഭാരമെന്നാണ് ആർട്ടിഫിഷ്യൽ ഇന്റലിജൻസ് സാങ്കേതിക വിദ്യ പറയുന്നത്. മേയ് 16ന് നടന്ന പൊതുചടങ്ങിൽ പങ്കെടുത്ത കിം ക്ഷീണിതനായിരുന്നു. കണ്ണിനു ചുറ്റും കറുത്ത പാടുകളുണ്ട്. ഇതൊക്കെയും ഉറക്കമില്ലായ്മയുടെ ലക്ഷണങ്ങളാണ്. അതേസമയം അമേരിക്കൻ – ദക്ഷിണ കൊറിയ സൈനിക നീക്കങ്ങളെ നിരീക്ഷിക്കാനായി ആദ്യ ചാര ഉപഗ്രഹം വിക്ഷേപിക്കാനുള്ള ഉത്തര കൊറിയയുടെ ശ്രമം പരാജയപ്പെട്ടിരുന്നു