ഗാനഗന്ധർവ്വന് ആശംസകളർപ്പിച്ച് മോദി; ദേവി മൂകാംബികയുടെ സവിധത്തിൽ നിന്നു നന്ദി കുറിച്ച് ഗാനചക്രവർത്തി

ദില്ലി: എൺപതാം ജന്മദിനം ആഘോഷിക്കുന്ന ഗാനഗന്ധർവ്വൻ കെ ജെ. യേശുദാസിന് പിറന്നാൾ ആശംസകൾ നേർന്ന് പ്രധാനമന്ത്രി നരേന്ദ്ര മോദി. ട്വിറ്ററിലൂടെയാണ് പ്രധാനമന്ത്രി യേശുദാസിന് ആശംസകൾ അറിയിച്ചത്. എൺപതാം പിറന്നാൾ ആഘോഷിക്കുന്ന ഈ പ്രത്യേക അവസരത്തിൽ കെ ജെ യേശുദാസ് ജിക്ക് തന്റെ പിറന്നാൾ ആശംസകളെന്ന് മോദി ട്വീറ്റ് ചെയ്തു.

‘ശ്രുതിമധുരമായ സംഗീതവും ഭാവതരളമായ ആലാപനവും അദ്ദേഹത്തെ എല്ലാ പ്രായക്കാർക്കും ഒരേപോലെ പ്രിയങ്കരനാക്കി. ഇന്ത്യൻ സംസ്‌കാരത്തിന് അദ്ദേഹം വിലപ്പെട്ട സംഭാവനകൾ നൽകിയിട്ടുണ്ട്. അദ്ദേഹത്തിന് ദീർഘായുസും ആയുരാരോഗ്യവും നേരുന്നു’ പ്രധാനമന്ത്രി ട്വിറ്ററിൽ കുറിച്ചു.

പ്രധാനമന്ത്രിയുടെ ട്വീറ്റിന് പിന്നാലെ ട്വിറ്ററിലൂടെ തന്നെ യേശുദാസ് അദ്ദേഹത്തിനുള്ള നന്ദി അറിയിച്ചു. താൻ ഇപ്പോൾ കൊല്ലൂർ മൂകാംബിക ക്ഷേത്രം സന്ദർശിക്കുകയാണെന്നും, അമ്മയോട് ലോകത്തിനാകെ വേണ്ടി പ്രാര്ഥിച്ചതായും, ദൈവം ഇന്ത്യയെ അനുഗ്രഹിക്കട്ടെ എന്നും യേശുദാസ് തന്റെ മറുപടി ട്വീറ്റിൽ കുറിച്ചു.