കൊൽക്കത്തയിലെ ജൂനിയർ ഡോക്ടറുടെ കൊലപാതകം : സിബിഐ അന്വേഷണം വൈകിപ്പിക്കാനാണ് മമത ബാനർജി ശ്രമിക്കുന്നത് ! രൂക്ഷ വിമർശനവുമായി കേന്ദ്രമന്ത്രി സുകാന്ത മജുംദാർ

കൊൽക്കത്തയിലെ ആർ ജി കാർ മെഡിക്കൽ കോളേജ് ആശുപത്രിയിൽ ജൂനിയർ ഡോക്ടറെ ബലാത്സംഗം ചെയ്ത് കൊലപ്പെടുത്തിയ സംഭവത്തിൽ ബംഗാൾ മുഖ്യമന്ത്രി മമത ബാനർജിക്കെതിരെ രൂക്ഷ വിമർശനവുമായി കേന്ദ്രമന്ത്രി സുകാന്ത മജുംദാർ. സിബിഐ അന്വേഷണം നടക്കുന്നത് വൈകിപ്പിക്കാനാണ് മമത ശ്രമിക്കുന്നതെന്ന് സുകാന്ത മജുംദാർ ആരോപിച്ചു.

ഈ കേസിൽ സിബിഐ അന്വേഷണം നടത്തണം. എന്നാൽ അന്വേഷണം വൈകിപ്പിക്കാനാണ് മുഖ്യമന്ത്രിയുടെ ശ്രമം. ഇത്തരം കേസുകളിൽ ചില തെളിവുകൾ ദിവസങ്ങളോളം സൂക്ഷിക്കാനാകില്ല. അതുകൊണ്ട് തന്നെ അന്വേഷണം എത്രയും വേഗം കൈമാറണമെന്നും കേന്ദ്രമന്ത്രി ആവശ്യപ്പെട്ടു. അതേസമയം, കേസിൽ നിഷ്പക്ഷമായ അന്വേഷണം നടത്തണമെന്നും കുറ്റവാളികൾക്ക് കടുത്ത ശിക്ഷ ഉറപ്പാക്കണമെന്നും ഇന്ത്യൻ മെഡിക്കൽ അസോസിയേഷൻ ബംഗാൾ സർക്കാരിനോട് ആവശ്യപ്പെട്ടിരുന്നു. ഇത്തരം സാഹചര്യങ്ങളെ കുറിച്ചും ജോലിസ്ഥലത്ത് സ്ത്രീകളുടെ സുരക്ഷ ഉറപ്പാക്കുന്നതിനുള്ള നടപടികൾ സംബന്ധിച്ചും വിശദമായ അന്വേഷണം വേണമെന്ന് ഐഎംഎ കേന്ദ്രമന്ത്രി ജെ പി നദ്ദയോടും ആവശ്യപ്പെട്ടിട്ടുണ്ട്. ഇത് സംബന്ധിച്ചുള്ള കത്തും ഐഎംഎ കൈമാറിയിട്ടുണ്ട്.