കെഎസ്ആർടിസിയിൽ 24 മണിക്കൂ‍ർ പണിമുടക്ക്; ആഹ്വനം ചെയ്ത പ്രതിപക്ഷ സംഘടനകൾ, ഡയസ്നോൺ പ്രഖ്യാപിച്ചു

തിരുവനന്തപുരം: കെ എസ് ആർ ടി സിയിൽ ശമ്പള പ്രതിസന്ധിക്കെതിരെ പ്രതിഷേധിച്ച് വിവിധ തൊഴിലാളി യൂണിയനുകൾ പ്രഖ്യാപിച്ച പണിമുടക്ക് തുടങ്ങി. അർദ്ധരാത്രി തുടങ്ങിയ പണിമുടക്ക് വെള്ളിയാഴ്ച രാത്രി 12 മണി വരെ തുടരുമെന്നാണ് വിവരം. അതേസമയം സമരത്തെ നേരിടാൻ മാനേജ്മെൻറ് ഡയസ്നോൺ പ്രഖ്യാപിച്ചിട്ടുണ്ടെങ്കിലും പണിമുടക്കിൽ ഉറച്ച് നിൽക്കുന്നതായി ഐ എൻ ടി യു സി, ബി എം എസ്, എ ഐ ടി യു സി യൂണിയനുകൾ അറിയിച്ചു.

സമരത്തിൽ നിന്ന് ഭരണാനുകൂല സംഘടനയായ സി ഐ ടി യു വിട്ടു നിൽക്കുന്നുണ്ടെങ്കിലും കൂടുതൽ ജീവനക്കാർ സമരത്തിന് ഇറങ്ങുകയാണ്. അതുകൊണ്ടുതന്നെ ഇത് യാത്രക്കാരെ വലിയ പ്രതിസന്ധിയിലാക്കും. തെക്കൻ ജില്ലകളിലെയും മലയോര മേഖലകളിലെയും യാത്രക്കാരാകും കൂടുതലും പണിമുടക്കിൽ വലയുക.

ശമ്പള വിതരണം അടക്കമുള്ള വിഷയങ്ങളിൽ കെ എസ് ആർ ടി സിയിലെ പ്രതിപക്ഷ സംഘടനകളും മാനേജ്മെന്റും നടത്തിയ ചർച്ച പരാജയമായതോടെയാണ് സമരം നടത്താമെന്ന തീരുമാനത്തിൽ തന്നെ സംഘടന മുന്നോട്ടു പോയത്. 24 മണിക്കൂർ പണിമുടക്കുമെന്നാണ് പ്രതിപക്ഷ സംഘടനകൾ അറിയിച്ചത്. കൂടാതെ മന്ത്രി മാധ്യമങ്ങൾക്ക് മുന്നിൽ പറഞ്ഞ വാക്ക് പാലിച്ചില്ലെന്നും സമരക്കാർ കുറ്റപ്പെടുത്തി.

ശമ്പളം നൽകാൻ സംസ്ഥാന സർക്കാരിന്റെ ഭാഗത്ത് നിന്നും ആത്മാർത്ഥമായ ഒരു ശ്രമവുമില്ല. ഗതികേട് കൊണ്ടാണ് സമരം ചെയ്യേണ്ടി വരുന്നതെന്ന് യാത്രക്കാർ മനസിലാക്കണം. ഇപ്പോൾ സൂചന സമരമാണ് പ്രഖ്യാപിച്ചിരിക്കുന്നതെന്നും അത് ഫലം കണ്ടില്ലെങ്കിൽ വലിയ പ്രക്ഷോഭം നടത്തുമെന്നും സംഘടനാ നേതാക്കൾ തിരുവനന്തപുരത്ത് അറിയിച്ചു.