അങ്കോലയിലെ മണ്ണിടിച്ചിൽ : രക്ഷാപ്രവർത്തനം അതീവ ദുഷ്കരം ! റഡാർ ഉപയോഗിച്ചുള്ള തെരച്ചിൽ തുടരുന്നു

ബെം​ഗളൂരു : കർണ്ണാടകയിലെ അങ്കോലയിൽ ദേശീയപാതയിലുണ്ടായ മണ്ണിടിച്ചിലിനെ തുടർന്ന് ലോറിയുള്‍പ്പെടെ മണ്ണിനടിയില്‍പ്പെട്ട മലയാളി ഡ്രൈവർ അർജുന്റെ തെരച്ചിലുമായി ബന്ധപ്പെട്ട് നിർണ്ണായക വിവരം പുറത്ത്. റ​ഡാർ ഉപയോ​ഗിച്ച് നടത്തിയ പരിശോധനയിൽ ഇതുവരെ മണ്ണിനടിയിൽ നിന്നും ഒന്നും കണ്ടെത്താൻ സാധിച്ചിട്ടില്ലെന്നാണ് പുറത്തുവരുന്ന വിവരം. ആദ്യം ലോറി റഡാറിൽ തെളിഞ്ഞു എന്ന റിപ്പോർട്ട് പുറത്തുവന്നുവെങ്കിലും എൻഐടി ഇത് സ്ഥിരീകരിച്ചിട്ടില്ല.

സൂറത്കൽ എൻഐടി സംഘമാണ് പരിശോധന നത്തുന്നത്. ഒരു മണിക്കൂറായി റഡാർ ഉപയോ​ഗിച്ച് പരിശോധന നടത്തിവരികെയാണ്. രാവിലെ 6.30യോടെയാണ് അർജുനായുള്ള തെരച്ചിൽ ഇന്ന് പുനരാരംഭിച്ചത്. അതേസമയം, മേഖലയിൽ മണ്ണിടിച്ചിൽ തുടരുന്നതിനാൽ രക്ഷാപ്രവർത്തനം അതീവ ദുഷ്കരമെന്നാണ് പുറത്തുവരുന്ന വിവരം. മണ്ണിടിഞ്ഞതിനെ തുടർന്ന് വൻപാറക്കല്ലുകളും പുറത്തുവരുന്നുണ്ട്. അതിനാൽ സി​ഗ്നൽ ലഭിക്കാൻ പ്രയാസം നേരിടുന്നതായും അധികൃതർ അറിയിച്ചു.

അതേസമയം, ജെസിബി ഉപയോ​ഗിച്ച് മണ്ണ് മാറ്റിയും തെരച്ചിൽ നടത്തുന്നുണ്ട്. ലോറി കണ്ടെത്തിയാൽ അവിടം കേന്ദ്രീകരിച്ച് മണ്ണ് മാറ്റി പരിശോധന നടത്താനാണ് അധികൃതരുടെ തീരുമാനം. റഡാർ ഉപയോ​ഗിച്ച് കൂടുതൽ ലൊക്കേഷനുകളിൽ പരിശോധന നടത്താനാണ് ഇപ്പോൾ ശ്രമിക്കുന്നത്.