ആമ്പല്ലൂരിൽ എൽപിജി പൈപ്പ് ലൈനിൽ ചോർച്ച; ജനങ്ങൾക്ക് ജാഗ്രതാ നിർദ്ദേശം, സ്ഥിതി നിയന്ത്രണവിധേയം

ആമ്പല്ലൂർ: തൃശൂർ ആമ്പല്ലൂർ മണലിക്ക് സമീപം മടവാക്കരയിൽ കൊച്ചി-സേലം എൽപിജി പൈപ്പ് ലൈനിൽ വാതകച്ചോർച്ച. പൈപ്പ് ലൈനിൽ അറ്റകുറ്റപ്പണികൾ നടക്കുന്നതിനിടെയാണ് അപ്രതീക്ഷിതമായി ചോർച്ച ഉണ്ടായത്. വലിയ തോതിൽ വാതകം പുറത്തേക്ക് പ്രവഹിച്ചതോടെ അധികൃതർ പൈപ്പ് ലൈനിന്റെ വാൽവ് അടിയന്തരമായി അടച്ചു. നിലവിൽ പൈപ്പ് ലൈനിൽ തങ്ങിനിൽക്കുന്ന വാതകമാണ് പുറത്തേക്ക് വരുന്നത്.

ചോർച്ച റിപ്പോർട്ട് ചെയ്ത ഉടൻ തന്നെ പുതുക്കാട് നിന്നുള്ള അഗ്നിരക്ഷാസേന സ്ഥലത്തെത്തി സുരക്ഷാ നടപടികൾ ആരംഭിച്ചു. വാതകത്തിന്റെ സാന്ദ്രത കുറയ്ക്കുന്നതിനായി ചോർച്ചയുള്ള ഭാഗത്തേക്ക് അഗ്നിരക്ഷാസേന ശക്തമായി വെള്ളം പമ്പ് ചെയ്യുന്നുണ്ട്. വാതകത്തിന്റെ രൂക്ഷമായ ഗന്ധം പ്രദേശം മുഴുവൻ വ്യാപിച്ചതിനെത്തുടർന്ന് ജനങ്ങൾക്കിടയിൽ ചെറിയ തോതിൽ പരിഭ്രാന്തി പടർന്നെങ്കിലും സ്ഥിതിഗതികൾ ഇപ്പോൾ പൂർണ്ണമായും നിയന്ത്രണവിധേയമാണെന്ന് അധികൃതർ അറിയിച്ചു.

ചോർച്ചയുണ്ടായ പ്രദേശത്തെ വീടുകളിലും സ്ഥാപനങ്ങളിലും പോലീസ്, വില്ലേജ് ഓഫീസ്, അഗ്നിരക്ഷാസേന ഉദ്യോഗസ്ഥർ നേരിട്ടെത്തി മുൻകരുതൽ നിർദ്ദേശങ്ങൾ നൽകി. സുരക്ഷ കണക്കിലെടുത്ത് വീടുകളിൽ തീ ഉപയോഗിക്കുന്നതിനും വൈദ്യുതി ഉപകരണങ്ങൾ പ്രവർത്തിപ്പിക്കുന്നതിനും താൽക്കാലിക നിയന്ത്രണം ഏർപ്പെടുത്തിയിട്ടുണ്ട്. ഷോർട്ട് സർക്യൂട്ട് വഴി അപകടങ്ങൾ ഉണ്ടാകാതിരിക്കാനാണ് ഈ മുൻകരുതൽ.

പൈപ്പ് ലൈനിന്റെ ചുമതലയുള്ള കെഎസ്പിപിഎൽ (KSPPL), പ്രമുഖ പെട്രോളിയം കമ്പനികളായ ബിപിസിഎൽ (BPCL), ഐഒസിഎൽ (IOCL) എന്നിവടങ്ങളിൽ നിന്നുള്ള സാങ്കേതിക വിദഗ്ധർ സ്ഥലത്തെത്തി പരിശോധന തുടരുകയാണ്. ചോർച്ച പൂർണ്ണമായും അടയ്ക്കാനുള്ള ശ്രമങ്ങൾ യുദ്ധകാലാടിസ്ഥാനത്തിൽ പുരോഗമിക്കുന്നു. നിലവിൽ ആശങ്കപ്പെടേണ്ട സാഹചര്യമില്ലെന്നും ഉദ്യോഗസ്ഥരുടെ നിർദ്ദേശങ്ങൾ പാലിക്കണമെന്നും ജില്ലാ ഭരണകൂടം അറിയിച്ചു.