നിയമ നടപടി സ്വീകരിക്കും !ലൈംഗിക പീഡനാരോപണം നിഷേധിച്ച് നടൻ നിവിൻ പോളി; ഇന്ന് തന്നെ കൊച്ചിയിൽ മാദ്ധ്യമങ്ങളെ കാണും

കൊച്ചി : തനിക്കെതിരെ ഉയർന്ന ലൈംഗിക പീഡനാരോപണം നിഷേധിച്ച് നടൻ നിവിൻ പോളി. സംഭവത്തിൽ നിയമനടപടി സ്വീകരിക്കുമെന്നും നടൻ വ്യക്തമാക്കി. എറണാകുളം നേര്യമംഗലം സ്വദേശിനിയാണ് നല്‍കിയ പരാതിയിലാണ് ഊന്നുകല്‍ പോലീസ് നിവിൻ പോളിയടക്കം ആറ് പേരെ പ്രതികളാക്കി കേസെടുത്തത്. നിവിൻ പോളി കേസിലെ ആറാം പ്രതിയാണ്. ഇന്ന് രാതി 9.10 ന് നിവിൻ കൊച്ചിയിൽ മാദ്ധ്യമ പ്രവർത്തകരെ കാണും.

2023-ൽ വിദേശത്തുവെച്ചാണ് പീഡനം നടന്നുവെന്നാണ് യുവതി ആരോപിക്കുന്നത് . വിദേശത്ത് മറ്റൊരു ജോലിയുമായി ബന്ധപ്പെട്ടാണ് യുവതി പോയത്. അതിനിടയിലാണ് പരാതിക്കാസ്പദമായ സംഭവം നടന്നത്. ഒരു വനിതാ സുഹൃത്താണ് തന്നെ നടന്റെ മുന്നിലേക്കെത്തിച്ചതെന്നും യുവതിയുടെ പരാതിയിൽ പറയുന്നു. നിവിൻ പോളി, പരാതിക്കാരിയുടെ വനിതാ സുഹൃത്ത്, മറ്റ് നാലുപേർ എന്നിവരാണ് കേസിൽ ഉൾപ്പെട്ടിരിക്കുന്നത്.

അതേസമയം യുവതി ഒരുമാസം മുൻപ് ഊന്നുകൽ പോലീസിന് നൽകിയ ആദ്യപരാതിയിൽ പീഡന ആരോപണമില്ലായിരുന്നു. നിവിൻ പോളി ഉൾപ്പെടെയുള്ളവർ മർദിച്ചു എന്നായിരുന്നു പരാതിയിലുണ്ടായിരുന്നത്. ഇതിൽ പോലീസ് പ്രാഥമിക അന്വേഷണം നടത്തി എസ്.പിക്ക് റിപ്പോർട്ട് നൽകിയിരുന്നു. സംഭവത്തിൽ ചില പൊരുത്തക്കേടുകൾ ഉണ്ടെന്നായിരുന്നു പോലീസിന്റെ റിപ്പോർട്ട്.