ഈ ദുഷ്ടശക്തികൾക്കെതിരെ നമുക്ക് ഒരുമിച്ച് പോരാടാം, ! പി വി അൻവറിനെ പിന്തുണച്ച് മുസ്ലിം ലീഗിന്റെ പ്രാദേശിക നേതാവ് ; വിവാദമായതോടെ പോസ്റ്റ് ഡിലീറ്റ് ചെയ്തു !

നിലമ്പൂര്‍ : മുഖ്യമന്ത്രി പിണറായി വിജയനും പി വി അൻവർ എംഎൽഎയും തമ്മിലുള്ള അസ്വാരസ്യങ്ങൾ കടുക്കവേ അൻവറിനെ പിന്തുണച്ച് മുസ്ലിം ലീഗിന്റെ പ്രാദേശിക നേതാവ്. മുസ്ലിം ലീഗ് നിലമ്പൂര്‍ മണ്ഡലം പ്രസിഡന്റ് ഇഖ്ബാല്‍ മുണ്ടേരിയാണ് അൻവറിനെ ഐക്യദാർഢ്യവുമായി രംഗത്തെത്തിയത്. സ്വാതന്ത്ര്യസമരസേനാനിയായ ഷൗക്കത്ത് അലി സാഹിബിന്റെ മകന്‍ പി.വി. അന്‍വറിന്റെ യഥാര്‍ഥ മുഖം ഇനിയാണ് പിണറായി വിജയന്‍ കാണേണ്ടതെന്നും അദ്ദേഹം പറഞ്ഞു. ഈ ദുഷ്ടശക്തികള്‍ക്കെതിരെ നാടിന്റെ നന്മയ്ക്കുവേണ്ടി ഒന്നിച്ച് പോരാടാമെന്നും ഇഖ്ബാല്‍ മുണ്ടേരി പറഞ്ഞു.

ഫെയ്‌സ്‌ബുക്കിൽ പങ്കുവച്ച പോസ്റ്റിലൂടെയായിരുന്നു ഇഖ്ബാൽ മുണ്ടേരിയുടെ പ്രതികരണം. സിപിഎമ്മിൽ ഒറ്റപ്പെട്ട അൻവറിനെ യുഡിഎഫ് സ്വീകരിക്കില്ലെന്ന് നേതാക്കൾ ആവർത്തിക്കുമ്പോഴുള്ള പോസ്റ്റ് വിവാദമായതോടെ ഇഖ്ബാൽ മുണ്ടേരി പിൻവലിച്ചു. ഇഖ്ബാൽ മുണ്ടേരിയുടെ ഫെയ്‌സ്‌ബുക്ക് പോസ്റ്റിനെ കുറിച്ച് അറിയില്ലെന്ന് മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടി പ്രതികരിച്ചു.