മദ്യനയ അഴിമതി കേസ് ; അരവിന്ദ് കെജ്‌രിവാളിന് വീണ്ടും നോട്ടീസയച്ച് ഇ ഡി ; ഇനിയും ഹാജരായില്ലെങ്കിൽ കർശന നടപടി സ്വീകരിക്കും !

ദില്ലി : മദ്യനയ അഴിമതിയുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ ദില്ലി മുഖ്യമന്ത്രി അരവിന്ദ് കെജ്‌രിവാൾ വീണ്ടും നോട്ടീസ് അയച്ച് ഇ ഡി. ചോദ്യം ചെയ്യലിന് മാർച്ച് 4ന് അന്വേഷണ സംഘത്തിന് മുൻപിൽ ഹാജരാകാൻ ആവശ്യപ്പെട്ടാണ് നോട്ടീസയച്ചിരിക്കുന്നത്. തുടർച്ചയായ എട്ടാം തവണയാണ് കെജ്‌രിവാളിന് ഇ ഡി നോട്ടീസ് നൽകുന്നത്.

കഴിഞ്ഞ ഏഴ് തവണയും അരവിന്ദ് കെജ്‌രിവാൾ ഒഴിവുകഴിവുകൾ പറഞ്ഞ് ചോദ്യം ചെയ്യലിന് ഹാജരായിരുന്നില്ല. ഇതേ തുടർന്നാണ് എട്ടാം തവണയും ഇ ഡി നോട്ടീസ് നൽകിയിരിക്കുന്നത്. അതേസമയം, ഇനിയും ഹാജരായില്ലെങ്കിൽ കർശന നടപടി സ്വീകരിക്കാനാണ് ഇ ഡിയുടെ നീക്കം. നിലവിൽ കെജ്‌രിവാളിനെതിരെ ഇ ഡി നൽകിയ കേസ് ദില്ലി കോടതിയുടെ പരിഗണനയിലാണ്. കള്ളപ്പണം വെളുപ്പിക്കലുമായി ബന്ധപ്പെട്ട കേസുകൾ പ്രത്യേക കോടതി മാർച്ച് 16 ന് പരിഗണിക്കുകയാണ്. എന്തുകൊണ്ടാണ് അരവിന്ദ് കെജ്‌രിവാൾ ഏഴ് സമൻസുകൾ നിരസിച്ചതെന്ന് അന്ന് വിശദീകരിക്കേണ്ടതുണ്ട്. അതേസമയം, കോടതി തടയാത്തതിനാൽ സമൻസ് അയച്ചുകൊണ്ടിരിക്കുകയാണെന്നും ഇഡി വ്യക്തമാക്കി.