മഅ്ദനി തീവ്രവാദ ചിന്ത കേരളത്തിലുടനീളം വർദ്ധിപ്പിക്കുന്നതിനു വേണ്ടി പ്രഭാഷണങ്ങൾ നടത്തി; പിഡിപി നേതാവ് അബ്ദുൾ നാസർ മഅ്ദനിയ്‌ക്കെതിരെ ആരോപണം ഉന്നയിച്ച സിപിഎം നേതാവ് പി ജയരാജൻ

തിരുവനന്തപുരം: പിഡിപി നേതാവ് അബ്ദുൾ നാസർ മഅ്ദനിയ്‌ക്കെതിരെ ശക്തമായ ആരോപണം ഉന്നയിച്ച സിപിഎം നേതാവ് പി ജയരാജൻ. മാതൃഭൂമി ബുക്‌സ് പ്രസിദ്ധീകരിച്ച ‘കേരള മുസ്ലീം രാഷ്ട്രീയം, രാഷ്ട്രീയ ഇസ്ലാം’ എന്ന പുസ്തകത്തിലാണ് ജയരാജൻ ഈ ആരോപണങ്ങൾ നൽകിയത്.

മഅ്ദനി സംഘടനയെ കേരളത്തിൽ വളർത്തുകയും, കേരളത്തിലുടനീളം തീവ്രവാദ ചിന്ത വർദ്ധിപ്പിക്കുന്നതിനു വേണ്ടി പ്രഭാഷണ പരമ്പരകൾ നടത്തുകയും ചെയ്തുവെന്നാണ് അദ്ദേഹത്തിന്റെ ആരോപണം. ഇസ്ലാമിക് സ്റ്റേറ്റിനെയും മഅ്ദനിയെയും മുൻനിർത്തിയാണ് അദ്ദേഹം മുസ്ലിം തീവ്രവാദത്തെ കുറിച്ച് വിശദീകരിച്ചത്. ബാബറി മസ്ജിദിന്റെ തകർച്ചയ്ക്ക് ശേഷമാണ്, മുസ്ലീം ന്യൂനപക്ഷങ്ങൾക്കിടയിൽ മഅ്ദനിയുടെ സ്വാധീനം വർദ്ധിച്ചതായി ജയരാജൻ പറയുന്നു.

മഅ്ദനിയുടെ കേരള സന്ദർശനം, യുവാക്കളിൽ തീവ്രവാദ പ്രവർത്തനത്തിലേക്ക് ആകർഷിക്കുന്നതിൽ പ്രധാന പങ്കുവഹിച്ചു. ഈ സാഹചര്യത്തിലാണ് മഅ്ദനിയെ മുസ്ലിം തീവ്രവാദ പ്രവർത്തനങ്ങളുടെ അംബാസിഡറായി വിശേഷിപ്പിക്കുന്നതെന്നും അദ്ദേഹം പുസ്തകത്തിൽ പറയുന്നു. സ്വന്തം സമുദായത്തിൽ നിന്നുതന്നെ ഇതിനെതിരെ വിമർശനമുയർന്നുവന്നപ്പോഴാണ് ഐഎസ്എസ് പിരിച്ചുവിട്ട് കൂടുതൽ വിപുലമായ പ്രവർത്തന പദ്ധതികളുമായി പീപ്പിൾസ് ഡെമോക്രാറ്റിക് പാർട്ടി (പിഡിപി) രൂപീകരിച്ചതെന്നും ജയരാജൻ കുറ്റപ്പെടുത്തി.

“അതിവൈകാരിക പ്രസംഗങ്ങൾ വഴി മഅ്ദനി തീവ്രചിന്തകൾ വളർത്താൻ ശ്രമിച്ചു. തന്റെ പ്രഭാഷണങ്ങളിൽ, അദ്ദേഹം മതത്തിന്റെ പേരിൽ മുസ്ലിം യുവാക്കളെ സുരക്ഷിതത്വത്തിന്റെ പേരിൽ തീവ്രവാദത്തിലേക്ക് ആകർഷിച്ചു.” ഒട്ടേറെ അക്രമ സംഭവങ്ങളിൽ പ്രതി ചേർക്കപ്പെട്ട കണ്ണൂർ സ്വദേശി തടിയന്റവിട നസീർ മഅ്ദനിയുടെ അതിവൈകാരിക പ്രഭാഷണങ്ങളിൽ ആകൃഷ്ടനായെന്നും പി ജയരാജൻ പുസ്തകത്തിൽ പറയുന്നുണ്ട്.