ചെമ്പഴന്തിയിൽ മഹാത്മാ അയ്യങ്കാളി സ്മൃതി ദിനാചരണം നാളെ; വി. മുരളീധരൻ എം.എൽ.എ പുഷ്പാർച്ചന നടത്തും

തിരുവനന്തപുരം: ഭാരതീയ ജനതാ പാർട്ടി അയ്യങ്കാളി നഗർ യൂണിറ്റിന്റെ നേതൃത്വത്തിൽ നാളെ മഹാത്മാ അയ്യങ്കാളിയുടെ സ്മൃതി ദിനം ആചരിക്കും. ജൂൺ 18 വ്യാഴാഴ്ച രാവിലെ 8 മണിക്ക് ചെമ്പഴന്തി അയ്യങ്കാളി നഗറിലാണ് സ്മൃതി ദിനാചരണ ചടങ്ങുകൾ സംഘടിപ്പിച്ചിരിക്കുന്നത്. ഒരു കാലഘട്ടത്തിൽ സമൂഹത്തിൽ നിന്നും പുറന്തള്ളപ്പെട്ടിരുന്ന അധഃസ്ഥിത വർഗ്ഗത്തെ കൈപിടിച്ചുയർത്തുകയും അവരുടെ ഉന്നമനത്തിനായി അക്ഷീണം പ്രവർത്തിക്കുകയും ചെയ്ത മഹാത്മാ അയ്യങ്കാളിയുടെ ഓർമ്മ പുതുക്കുന്നതിനാണ് വിപുലമായ ഈ പരിപാടി സംഘടിപ്പിച്ചിട്ടുള്ളത്.

ദിനാചരണത്തിന്റെ ഭാഗമായി ചെമ്പഴന്തിയിലെ അയ്യങ്കാളി പ്രതിമയിൽ കഴക്കൂട്ടം എംഎൽഎയും മുൻകേന്ദ്രമന്ത്രിയുമായ വി. മുരളീധരൻ പുഷ്പാർച്ചന നടത്തും. തുടർന്ന് പ്രദേശത്തെ മുതിർന്ന പൗരന്മാരെ ആദരിക്കുന്ന ചടങ്ങും വസ്ത്രദാനവും ഉണ്ടായിരിക്കുന്നതാണ്. ചടങ്ങിൽ പങ്കെടുക്കുന്നവർക്കായി ലഘുഭക്ഷണവും ബിജെപി എകെ നഗർ സമിതിയുടെ നേതൃത്വത്തിൽ ഒരുക്കിയിട്ടുണ്ട്.