മഹിളാ മോർച്ച സംസ്ഥാന പോലീസ് മേധാവിയുടെ വസതിയിലേക്ക് നടത്തിയ പ്രതിഷേധം, മൂന്ന് പോലീസുകാർക്ക് സസ്പെൻഷൻ, പോലീസിൻ്റെ പേരിന് കളങ്കമുണ്ടാക്കിയെന്ന് കണ്ടെത്തൽ

തിരുവനന്തപുരം: സംസ്ഥാന പോലീസ് മേധാവിയുടെ വീട്ടിലേക്ക് മഹിളാ മോർച്ച പ്രവർത്തകർ നടത്തിയ പ്രതിഷേധത്തിൽ മൂന്ന് പൊലീസുകാർക്ക് സസ്പെൻഷൻ. അന്നേദിവസം ഡി.ജി.പിയുടെ വസതിയിൽ സുരക്ഷാ ഡ്യൂട്ടിയിലുണ്ടായിരുന്ന പോലീസുകാർക്കെതിരെ വകുപ്പുതല നടപടിയെടുത്ത് കൊണ്ടുള്ള ഉത്തരവ് പുറത്തിറങ്ങി. ആർ.ആർ.ആർ.എഫിലെ പൊലീസുകാരായ മുരളീധരൻ നായർ, മുഹമ്മദ് ഷെബിൻ, സജിൻ എന്നിവരെയാണ് സസ്പെൻഡ് ചെയ്തത്. ഈ പൊലീസുകാരാണ് ഡി.ജി.പിയുടെ വീട്ടിൽ ഗാർഡ് ഡ്യൂട്ടിയിലുണ്ടായിരുന്നത്. വണ്ടിപ്പെരിയാറിലെ ആറ് വയസുകാരിയെ പീഡനത്തിന് ഇരയാക്കിയ ശേഷം കൊലപാതകം നടത്തിയ ആളെ കോടതി വെറുതെ വിട്ടതിൽ പ്രതിഷേധിച്ചായിരുന്നു മഹിളാമോർച്ച പോലീസ് മേധാവിയുടെ വസതിയിലേക്ക് മാർച്ച് നടത്തിയത്.

സുരക്ഷാവീഴചയിലാണ് ബാറ്റാലിയൻ ഡി.ഐ.ജി ഇവരെ സസ്പെൻഡ് ചെയ്തത്. മഹിളാ മോർച്ചാ പ്രവർത്തകർ ഡി.ജി.പിയുടെ ഔദ്യോഗിക വസതിയിലേക്ക് പ്രതിഷേധ മുദ്രാവാക്യം മുഴക്കി കയറിയിരുന്നു. ഇവരെ സ്ഥലത്ത് നിന്ന് മാറ്റാൻ വളരെ പ്രയാസപ്പെട്ടിരുന്നു. അതേസമയം, സ്ഥലത്ത് വനിതാ പൊലീസ് ഇല്ലാത്തതിനാൽ പ്രതിഷേധം തുടരുകയും പിന്നീട് കൂടുതൽ പൊലീസെത്തി മഹിളാ മോർച്ച പ്രവർത്തകരെ ബലംപ്രയോ​ഗിച്ച് നീക്കുകയുമായിരുന്നു.

ഡി.ജി.പിയുടെയോ ഉന്നത ഉദ്യോഗസ്ഥരുടെയോ അനുമതിയില്ലാതെയാണ് പൊലീസുകാർ ഗേറ്റ് തുറന്നതെന്നും നടപടി പൊലീസിൻ്റെ പേരിന് കളങ്കമുണ്ടാക്കിയെന്നും സസ്പെൻഡ് ചെയ്തു കൊണ്ടുള്ള ഉത്തരവിൽ പറയുന്നു. അറസ്റ്റ് ചെയ്ത വനിതാ പ്രവർത്തകർക്കെതിരെ അറസ്റ്റ് ചെയ്യുകയും പിന്നീട് വിട്ടയക്കുകയും ചെയ്തിരുന്നു.