മലയാളി ഗോൾകീപ്പർ പി ആർ ശ്രീജേഷ് ഇന്ത്യൻ ഹോക്കിയുടെ ദൈവം ! വിരമിക്കരുതെന്ന് ഇന്ത്യൻ ഹോക്കി പ്രസിഡന്റ് ദിലീപ് ടിർക്കി

മലയാളി ഗോൾകീപ്പർ പി ആർ ശ്രീജേഷ് ഇന്ത്യൻ ഹോക്കിയുടെ ദൈവമാണെന്ന് ഇന്ത്യൻ ഹോക്കി പ്രസിഡന്റ് ദിലീപ് ടിർക്കി. ശ്രീജേഷിന്റെ മികവിലാണ് ബ്രിട്ടനെ തകർത്ത് ഇന്ത്യ സെമി ഫൈനലിലേക്ക് മുന്നേറിയത്. മത്സരത്തിൽ സുപ്രധാന സേവുകൾ നടത്തിയ ശ്രീജേഷ് ഷൂട്ടൗട്ടിലും ആ പോരാട്ടം തുടർന്നു. അതിനാൽ ഇന്ത്യൻ ഹോക്കി ടീമിൽ പി ആർ ശ്രീജേഷ് തുടരണമെന്നാണ് ആഗ്രഹിക്കുന്നതെന്നു അദ്ദേഹം വ്യക്തമാക്കി.

പാരിസ് ഒളിമ്പിക്സിന് ശേഷം വിരമിക്കുമെന്ന പി ആർ ശ്രീജേഷിന്റെ പ്രസ്താവനയോട് പ്രതികരിക്കുകയായിരുന്നു ഇന്ത്യൻ ഹോക്കി പ്രസിഡന്റ് ദിലീപ് ടിർക്കി. അതേസമയം, ഇന്ത്യയെ സെമിയിൽ എത്തിച്ചതിൽ അതിയായ സന്തോഷം. ഗാലറിയിലുണ്ടായിരുന്ന കാണികൾ പേരെടുത്ത് പ്രോത്സാഹിപ്പിച്ചതിൽ അഭിമാനമുണ്ടെന്നാണ് സെമി ഫൈനലിന് ശേഷം പി ആർ ശ്രീജേഷ് പ്രതികരിച്ചത്. നല്ല പ്രകടനം പുറത്തെടുത്താൽ എതിർ ടീമിന്റെ ആരാധകരും നമ്മളെ പ്രോത്സാഹിപ്പിക്കും. താൻ രക്ഷകനാവുമെന്ന് ഇന്ത്യൻ ടീം പ്രതീക്ഷിച്ചിരുന്നു. ഇന്ത്യയെ ജയിപ്പിക്കാനാവുമെന്നതിൽ ഉറപ്പുണ്ടായിരുന്നുവെന്നും ശ്രീജേഷ് കൂട്ടിച്ചേർത്തു.