മേടപ്പുലരിയുടെ വരവറിയിച്ച് ലോകമെമ്പാടുള്ള മലയാളികൾ വിഷു ആഘോഷിക്കുന്നു, കാണിക്കാഴ്ച്ച ഒരുക്കിയും, കൈനീട്ടം നൽകിയും ആഘോഷം, ക്ഷേത്രങ്ങളിൽ വൻ ഭക്തജനത്തിരക്ക്

മേടപ്പുലരിയുടെ വരവറിയിച്ച് കേരളം ഇന്ന് വിഷു ആഘോഷിക്കുന്നു. ഐശ്വര്യത്തിന്റെയും സമ്പൽസമൃദ്ധിയുടെയും പ്രതീകമായ കാർഷികോത്സവമാണ് വിഷു. പരസ്പര സ്നേഹത്തിന്റെയും സാഹോദര്യത്തിന്റെയും വെൺപുലരിയാണ് മലയാളികൾക്ക് ഓരോ വിഷുക്കാലവും. കാണിക്കാഴ്ച ഒരുക്കിയും, പടക്കം പൊട്ടിച്ചും, കൈനീട്ടം നൽകിയും മലയാളികൾ വിഷു ആഘോഷിക്കുന്നു. നൂറ്റാണ്ടുകൾ പഴക്കമുള്ള ഒരു കാർഷിക സംസ്കൃതിയുടെ നിത്യനൂതനതയുടെ പ്രതീകം കൂടിയാണ് വിഷു. സനാതന സംസ്കാരത്തിന്റെ എല്ലാ സവിശേഷതകളും വിളിച്ചോതുന്ന ഉത്സവം.

ലോകമെമ്പാടുമുള്ള മലയാളികൾ മലയാളത്തനിമയോടെ തന്നെ വിഷു ആഘോഷിക്കുന്നു. ഇന്നലെ മുതൽ ഒരുക്കങ്ങൾ ആരംഭിച്ചു. കണിയൊരുക്കുന്ന വസ്തുക്കളുടെ വിപണി സജീവമായിരുന്നു. കണിക്കൊന്നപൂക്കുലയും കണിവെള്ളരിയും, ചക്കയും, മാങ്ങയും, കൈതച്ചക്കയും വിപണി കയ്യടക്കി. ഇന്ന് അതിരാവിലെ മുതൽ തന്നെ ശ്രീകൃഷ്ണ ക്ഷേത്രങ്ങളിൽ വലിയ ഭക്തജനത്തിരക്ക് അനുഭവപ്പെടുന്നുണ്ട്. ഗുരുവായൂർ, അമ്പലപ്പുഴ, തിരുവമ്പാടി, മലയിൻകീഴ് നെയ്യാറ്റിൻകര തുടങ്ങിയ ശ്രീകൃഷ്ണ ക്ഷേത്രങ്ങളിൽ ദർശനത്തിന് നീണ്ട ക്യു തുടരുകയാണ്. വിഷുവിനോട് അനുബന്ധിച്ചുള്ള വിശേഷാൽ പൂജകളും ചടങ്ങുകളും ക്ഷേത്രങ്ങളിൽ തുടരുകയാണ്.

രാഷ്ട്രപതിയും, പ്രധാനമന്ത്രിയും മലയാളികൾക്ക് വിഷു ആശംസകൾ നേർന്നു. ബംഗാൾ ഗവർണർ സി വി ആനന്ദ ബോസും കേരള ഗവർണർ രാജേന്ദ്ര ആർലേക്കറും വിഷു ആശംസകൾ അറിയിച്ചു. എല്ലാ പ്രേക്ഷകർക്കും തത്വമയിയുടെ വിഷു ആശംസകൾ.