മലയിടംതുരുത്ത് കുടിയൊഴിപ്പിക്കൽ; പോലീസ് നടപടികൾക്കുള്ള സാവകാശം ജൂൺ 16 വരെ നീട്ടി ഹൈക്കോടതി, പെരുമ്പാവൂർ മുൻസിഫ് കോടതി ഉത്തരവ് തടഞ്ഞു

കൊച്ചി : എറണാകുളം മലയിടംതുരുത്ത് പാരിയത്തുകാവ് പട്ടികജാതി ഉന്നതിയിലെ കുടിയൊഴിപ്പിക്കലുമായി ബന്ധപ്പെട്ട പോലീസ് നടപടികൾക്കുള്ള സാവകാശം ജൂൺ 16 വരെ നീട്ടി ഹൈക്കോടതി ഉത്തരവിട്ടു. ജില്ലാ പോലീസ് മേധാവിയുടെ പ്രത്യേക അപേക്ഷയും ഹർജിയും പരിഗണിച്ചാണ് ഹൈക്കോടതി സിംഗിൾ ബെഞ്ചിന്റെ ഈ സുപ്രധാന ഇടപെടൽ. വിഷയം ഹൈക്കോടതിയുടെ നേരിട്ടുള്ള പരിഗണനയിലിരിക്കെ, കുടിയൊഴിപ്പിക്കൽ നടപടികൾ ഈ മാസം 9നകം പൂർത്തിയാക്കണമെന്ന് ആവശ്യപ്പെട്ട് പെരുമ്പാവൂർ മുൻസിഫ് കോടതി പ്രത്യേകം ഉത്തരവിറക്കിയിരുന്നു. മുൻസിഫ് കോടതിയുടെ ഈ നിർദ്ദേശം തടയണമെന്ന റൂറൽ എസ്പിയുടെ ആവശ്യം അംഗീകരിച്ച ഹൈക്കോടതി, ജൂൺ 16 വരെ മുൻസിഫ് കോടതി ഈ വിഷയത്തിൽ മറ്റ് ഉത്തരവുകളൊന്നും പുറപ്പെടുവിക്കരുതെന്നും കർശനമായി വ്യക്തമാക്കിയിട്ടുണ്ട്.

സുപ്രീംകോടതിയുടെ മുൻ ഉത്തരവിന്റെ അടിസ്ഥാനത്തിലാണ് മെയ് 20ന് രാവിലെ പാരിയത്തുകാവ് പട്ടികജാതി ഉന്നതിയിലെ എട്ട് കുടുംബങ്ങളെ ഒഴുപ്പിക്കാനായി അധികൃതർ എത്തിയത്. അഡ്വക്കേറ്റ് കമ്മീഷൻ ജയപാലിന്റെ നേതൃത്വത്തിൽ കുടിയൊഴിപ്പിക്കൽ നടപടികൾ ആരംഭിച്ചതോടെ പ്രദേശവാസികളും നാട്ടുകാരും സംഘടിച്ച് ശക്തമായ പ്രതിഷേധവുമായി രംഗത്തിറങ്ങുകയായിരുന്നു. തുടർന്ന് പ്രതിഷേധം നിയന്ത്രണാതീതമായതോടെ പോലീസ് ഇടപെടുകയും വലിയ സംഘർഷത്തിലേക്ക് കാര്യങ്ങൾ നീങ്ങുകയും ചെയ്തു. പോലീസിന്റെ ഭാഗത്തുനിന്നും ക്രൂരമായ ലാത്തിച്ചാർജ്ജ് ഉണ്ടായതായും സ്ത്രീകളടക്കം നിരവധി പേർക്ക് സാരമായി പരിക്കേറ്റതായും പ്രതിഷേധക്കാർ ആരോപിച്ചിരുന്നു.

പാരിയത്തുകാവിലെ പട്ടികജാതി ഉന്നതിയിൽ മുൻപും പലതവണ കുടിയൊഴിപ്പിക്കൽ ശ്രമങ്ങൾ നടന്നിട്ടുണ്ടെങ്കിലും ജനകീയ പ്രക്ഷോഭങ്ങളെ തുടർന്ന് അധികൃതർക്ക് പിന്മാറേണ്ടി വന്നിരുന്നു. എന്നാൽ ഇത്തവണ ഒഴുപ്പിക്കൽ നടപടികളുമായി മുന്നോട്ട് പോകാൻ ഉറച്ചാണ് ഉദ്യോഗസ്ഥരും പോലീസും എത്തിയത്. കുടിയൊഴിപ്പിക്കലിനെതിരെ സംഘടിക്കുകയും ഉദ്യോഗസ്ഥരുടെ കൃത്യനിർവ്വഹണം തടസ്സപ്പെടുത്തുകയും ചെയ്ത അമ്പതോളം പേർക്കെതിരെ തടിയിട്ടപ്പറമ്പ് പോലീസ് നിലവിൽ കേസെടുത്തിട്ടുണ്ട്. ഹൈക്കോടതി ഇടപെട്ട് സാവകാശം നീട്ടിനൽകിയതോടെ പ്രദേശത്ത് താൽക്കാലികമായി സമാധാന അന്തരീക്ഷം കൈവന്നിട്ടുണ്ടെങ്കിലും വിഷയം വരും ദിവസങ്ങളിലും വലിയ രാഷ്ട്രീയ-സാമൂഹിക ചർച്ചകൾക്ക് വഴിവെക്കും.

–