മമ്മൂട്ടിയുടെ പിറന്നാൾ; 17 രാജ്യങ്ങളിൽ 40,000 പേരുടെ രക്തദാനവുമായി ആരാധകർ, വിപുലമായ ജീവകാരുണ്യ പ്രവർത്തനങ്ങൾ

കൊച്ചി: മെഗാസ്റ്റാർ മമ്മൂട്ടിയുടെ സെപ്റ്റംബർ 7-ലെ ജന്മദിനത്തോടനുബന്ധിച്ച് ലോകമെമ്പാടുമുള്ള ആരാധകർ വിപുലമായ ജീവകാരുണ്യ പ്രവർത്തനങ്ങൾക്ക് ഒരുങ്ങുന്നു. മമ്മൂട്ടി ഫാൻസ് ആൻഡ് വെൽഫെയർ അസോസിയേഷൻ ഇന്റർനാഷണലിന്റെ നേതൃത്വത്തിലാണ് വിവിധ രാജ്യങ്ങളിലായി സാമൂഹിക സേവന പ്രവർത്തനങ്ങൾ സംഘടിപ്പിക്കുന്നത്.

ഈ വർഷം 17 രാജ്യങ്ങളിലായി 40,000 പേരെ ഉൾപ്പെടുത്തി വമ്പിച്ച രക്തദാന ക്യാമ്പയിൻ സംഘടിപ്പിക്കാനാണ് സംഘടന ലക്ഷ്യമിടുന്നത്. ആരാധകർക്ക് പുറമെ വിദ്യാർത്ഥികൾ, വിവിധ കോർപ്പറേറ്റ് സ്ഥാപനങ്ങളിലെ ജീവനക്കാർ, സാംസ്കാരിക പ്രവർത്തകർ തുടങ്ങി സമൂഹത്തിന്റെ വിവിധ മേഖലകളിൽ നിന്നുള്ളവരും ഈ ബൃഹത്തായ സംരംഭത്തിന്റെ ഭാഗമാകും.

രക്തദാന ക്യാമ്പുകൾക്ക് പുറമെ കേരളത്തിന്റെ വിവിധ ഭാഗങ്ങളിലെ അനാഥാലയങ്ങളിൽ അന്നദാനം, പരിസര ശുചീകരണ പ്രവർത്തനങ്ങൾ ഉൾപ്പെടെ നിരവധി സാമൂഹ്യസേവന പരിപാടികളും ജന്മദിനാഘോഷങ്ങളുടെ ഭാഗമായി സംഘടിപ്പിക്കുന്നുണ്ട്.

കഴിഞ്ഞ വർഷങ്ങളിൽ 25,000 പേരുടെ രക്തദാനം വിജയകരമായി സംഘടിപ്പിച്ച അനുഭവത്തിന്റെ അടിസ്ഥാനത്തിലാണ് ഇത്തവണ 40,000 പേരെ ഉൾപ്പെടുത്തി പുതിയ ലക്ഷ്യം ആരാധക സംഘടന പ്രഖ്യാപിച്ചിരിക്കുന്നത്. മമ്മൂട്ടിയുടെ ജന്മദിനം ആഘോഷമെന്നതിലുപരി സമൂഹത്തിന് ഉപകാരപ്പെടുന്ന സേവന പ്രവർത്തനങ്ങളിലൂടെ മാതൃക സൃഷ്ടിക്കാനാണ് ആരാധകരുടെ ശ്രമം.